DÍLI, 20 Maiu 2026 (TATOLI) — Diretór Ezekutivu Luta Hamutuk, José Alves da Costa, husu ba líder nasionál sira no autoridade estadu atu halo reflesaun profundu kona-ba progresu no dezafiu iha ukun-an tinan 24, ho objetivu atu hadi’a povu nia moris.
Nia hateten katak entidade hotu-hotu, inklui líder nasionál, inan-aman, veteranu no intelektual sira presiza hamutuk atu halo avaliasaun ida kona-ba situasaun iha Timor-Leste, iha ne’ebé povu barak mak sei moris ho halerik ba nesesidade bázika.
“Povu sei halerik ba bee-moos, saúde, edukasaun, ai-han, empregu, no seluk-seluk tan. Entaun ida ne’e sai hanesan reflesaun atu nune’e bele solusiona no hadi’a povu nia moris iha futuru,” José hateten iha entrevista ho jornalista TATOLI iha Farol, Díli.
Diretór Luta Hamutuk mós subliña katak refleksaun husi entidade hotu-hotu, liuliu ukun na’in sira, importante atu bele lori benefísiu konkreta ba povu tomak.
“Ukun an ne’e sai grasa ida tanba ne’e presiza ita nia unidu entre jerasaun hotu-hotu hodi hamutuk iha objetivu ida de’it mak povu tenke sai husi mukit no kiak, povu tenke iha servisu, povu tenke iha direitu atu goza ukun an ida-ne’e ho diak,” nia hateten.
Nia akresenta katak refleksaun mak dalan di’ak ida atu lori mudansa foun hodi asegura justisa sosiál ba ema hotu.
“Depois refleksaun, iha futuru ita bele hahú buat foun ida ne’ebé bele fó grasa ida ba povu tomak,” nia konklui.
Jornalista: Camilio de Sousa
Editór: Filomeno Martins
