Vise PM Austrália-PM Xanana diskute kooperasaun servisu iha área defeza-seguransa
DILI, 20 Maiu 2026 (TATOLI)—Hafoin partisipa iha komemorasaun loron restaurasaun independénsia Timor-Leste ba da-24, Governu Austrália liuhusi Vise Primeiru-Ministru no Ministru Defeza, Richard Marles, kontinua hala’o enkontru ho Primeiru-Ministru, Kay Rala Xanana Gusmão hodi diskute kona-ba kooperasaun servisu iha área seguransa no defeza
Primeiru Ministru, Kay Rala Xanana Gusmão, hateten Vise PM Austrália, ohin mai atu hamutuk ho ita selebra restaurasaun independénsia Timor-Leste ba da-24
“Vise-PM nia prezensa iha ne’e ba daruak nian, nia mai bainhira ita selebra proklamasaun independénsia tinan 25 (2024), ne’ebé nia mós mai hodi ko’alia relasaun amizade entre Timor-Leste ho Australia,” Primeiru-Ministru informa iha Gabinete Fronteira Marítima, Palásiu Governu, ohin.
Xefe Governu dehan durante ne’e sira akompaña hela Timor nia desenvolvimentu, maibe sei iha buat barak ne’ebé TL presiza atu halo tanba hanesan nasaun amigu sira prontu atu apoiu Timor-Leste iha saida mak TL presiza sira bele ajuda, tanba mai hasoru malu ne’e atu espresa ba malu amizade, vontade ajuda.
Iha biban ne’e, Vise Primeiru-Ministru no Ministru Defeza, Richard Marles, hateten
Ida-ne’e hanesan onra boot ida atu bele hasoru malu ho Primeiru-Ministru ohin iha aniversáriu restaurasaun independénsia ba da-24.
“No di’ak tebes mós atu hasoru malu ho Ministru sira seluk ne’ebé ohin mai hamutuk ho ami. Ha’u iha ne’e hamutuk ho Luke Gosling ne’ebé nu’udar ita-nia Enviadu Espesiál ba Defeza, membru ida husi ita-nia Parlamentu,” Governante Austrália ne’e relata.
Vise Primeiru-Ministru Austrália ne’e afirma loron istóriku ida-ne’e hanesan momentu ida ba reflesaun, atu hanoin hikas kona-ba buat hotu ne’ebé akontese tiha kna iha tinan 24.
“Husi ita-nia perspetiva, saida mak ita haree ho Timor-Leste mak nasaun demokrátiku ne’ebé hakmatek, ne’ebé forte, ne’ebé iha ona Estadu direitu no hahú nia dezenvolvimentu. No tuir loloos, sira-ne’e mak realizasaun boot tebes bainhira ita kompara ida-ne’e ho nasaun sira seluk ne’ebé la’o ona iha viajen hanesan,” Ministru Defeza Austrália ne’e dehan.
Aleinde ne’e, ko’alia kona-ba futuru no oinsá nasaun rua ne’e bele servisu hamutuk liután iha dezenvolvimentu Timor-Leste nian, tanba iha inísiu tinan ida-ne’e, Primeiru-Ministru Albanese vizita mós vizita ona Timor-Leste, entaun ida-ne’e mak momentu ida-ne’ebé importante tebes iha ne’ebé ami eleva relasaun bilaterál maibé ami haree ba futuru iha termu sira oinsá ami bele koopera liután,” nia hateten.
Nia deklaran katak sira bele sai parseiru enerjétiku ne’ebé besik liu, no presiza asegura katak ida-ne’e akontese, ita bele halo barak liután ho ita-nia relasaun defeza nian.
Nia hatutan aleinde ne’e ohin mós Ministru Defeza Timor-Leste, Donaciano do Rosário, ho nia omologu konkorda ona atu asina akordu ida atu hametin liután kooperasaun defeza nian.
“No ami haree ho admirasaun ba Timor-Leste sai membru ASEAN, no ami hakarak tebes atu apoia Timor-Leste iha buat hotu ne’ebé nia halo ho ASEAN no ha’u hein atu fila-fali mai Timor-Leste,” nia dehan.
Enkuantu enkontru kortézia ne’e akompaña husi Enviadu Espesiál ba Asuntu Defeza, Veteranu no Norte Austrália, Luke Gosling MP.
Jornalista : Alexandra da Costa
Editór : Cancio Ximenes
