DILI, 21 Maiu 2026 (TATOLI)—Embaixadór Kanadá iha Timor-Leste, Jess Dutton, hala’o enkontru ho Primeiru-Ministru, Kay Rala Xanana Gusmão, hodi aprezenta investór sira husi Kanadá ne’ebé interese atu investe rekursu portensiál sira iha Timor-Leste.
Embaixadór Kanadá iha Timor-Leste, Jess Dutton, hateten nia ho ekipa delegasaun sente onradu bele hasoru Primeiru-Ministru, hodi diskute kona-ba kooperasaun servisu ne’ebé sira fó prioridade atu investe ba.
“Tanba ne’e iha vizita ne’e ami lori Prezidente Konsellu Negósiu Kanadá ASEAN, Fundasaun Ázia Pasífiku Kanadá, empreza Blackberry Government Solutions, Banku Nasionál Kanáda no Banku Dezenvolvimentu Ezportasaun Kanadá,” Embaixadór informa ba jornalista sira iha Palásiu Governu, ohin.
Tanba, nia dehan, Timor-Leste hanesan nasaun ne’ebé iha ninia rekursu potensiál barak tebes liuliu iha área mina no gás, turizmu no agrikultura, marítima no seluk tan.
Aleinde agora daudaun Timor-Leste mós sai ona membru ASEAN, entaun kompañia Kanadá barak mak iha interese atu dezenvolve oportunidade komersiál ho povu Timor-Leste.
Nune’e mós, nia dehan, iha enkontru ho Primeiru-Ministru ne’e sira ko’alia kona-ba oportunidade komersiál ba rekursu potensiál barak iha Timor-Leste, sira mós ko’alia kona-ba Kanadá nia engajamentu ho Timor-Leste, hanesan sira-nia negosiasaun komérsiu livre ho ASEAN.
“Maibé ha’u mós informa ba Primeiru-Ministru katak Kanadá orgullu tebes tanba fornese finansiamentu konsesionál hamutuk millaun $15 ba parké solár foun ne’ebé harii iha ne’e no ha’u hanoin ami iha idea barak ba kolaborasaun liután ba oin,” nia hateten.
Nia relata, aleinde sira hasoru malu ho Primeiru-Ministru maibé durante ne’e sira mós hasoru malu ho Ministru Petróleu no Rekursu Minerál inklui Ministru Komérsiu Indústria no klaru Kámara Komérsiu Indústria Timor-Leste, tanba sira observa katak iha oportunidade barak ba setór estrativu sira.
“Liuliu bainhira Timor-Leste kontinua dezenvolve nia rezerva mina no gás, ICT, iha mós oportunidade potensiál barak. Tanba ne’e mak kompañia Blackberry no setór bankária mai iha ne’e. Tanba ne’e, ha’u hein katak sei iha kompañia Kanadá sira seluk ne’ebé hakarak dezenvolve sira-nia interese iha ne’e ba tinan sira tuir mai,” nia dehan.
Kanadá iha kapasidade ne’ebé forte tebes iha setór ekstraktivu sira liuliu iha enérjia renovável ba mina no gás, teknolojia agrikultura no mariña.
Jornalista : Alexandra da Costa
Editór : Cancio Ximenes
