DILI, 21 Maiu 2026 (TATOLI)–Ministru Defeza, Kontra-Almirante, Donaciano do Rosário da Costa Gomes ‘Pedro Klamar Fuik’ halo enkontru ho Vise-Primeiru-Ministru no Ministru Defeza Austrália, Richard Marles, hodi ko’alia kona-ba hametin kooperasaun militár Timor-Leste ho Austrália.
Ministru Defeza, Pedro Klamar Fuik hateten, momentu ida-ne’e diskute forma atu hametin di’ak liután relasaun iha ámbitu kooperasaun militár.
“Ami konkorda ona hodi asina akordu bilaterál ida entre ami, depois sei dezenvolve akordu ne’e iha futuru para hametin liután formatu sira seluk ne’ebé mak besik liután rai rua ne’e,” Ministru Defeza hateten ba jornalista sira iha Kuartél Jenerál, Fatuhada, Kinta ne’e.
Notísia relevante : Timor-Leste no Australia diskute hametin koperasaun iha defeza, mobilidade laborál, no ASEAN
Asina kuadru kooperasaun ne’e, nasaun rua nafatin kontinua serbisu hamutuk ba oin atubele defende interrese no hakarak ida-ne’ebé mak hamutuk ba rai rua ne’e.
Iha fatin hanesan, Vise-Primeiru Ministru no Ministru Defeza Austrália, Richard Marles, sente onradu tanba bele hasoru malu ho Ministériu Defeza Timor-Leste hodi diskute no fó hanoin ba malu liga ho interrese rai rua ne’e, liuliu iha área defeza.
Ministru Defeza Austrália afirma hasoru malu ne’e iha objetivu boot nasaun rua bele iha domin boot ba malu nomós nasaun viziñu, nune’e merese atu fahe interrese ba malu.
“Ita-nia diskusaun ohin ne’e marka pozitivu tebes, depois ita haree asuntu seluk tan, liuliu kona-ba akordu defeza, ne’ebé mak antes ne’e mós ita hala’o hotu ona,” nia subliña.
Nia dehan, hasoru malu ne’e marka pasu pozitivu, ne’ebé parte rua sei esforsu hodi realiza iha mandatu ne’e.
“Liuhusi asina akordu sira-ne’e ami otimista tebes atu realiza serbisu sira liga ba área defeza nia iha parte rua,” governante australianu ne’e hato’o.
Jornalista : Natalino Costa
Editora : Julia Chatarina
