PR no PM agradese ba maturidade povu TL kria pás iha selebrasaun 20 Maiu
DILI, 21 Maiu 2026 (TATOLI)–Primeiru-Ministru, Kay Rala Xanana Gusmão, kinta ne’e, hasoru malu ho Xefe Estadu José Ramos-Horta hodi ko’alia kona-ba selebrasaun tinan 24 restaurasaun independénsia RDTL ba da-24 no agradese ba maturidade povu Timor-Leste nian hodi kria pás durante selebrasaun.
Notísia Relevante: Ramos-Horta: “Ha’u-nia mandatu asume kompromisu projeta TL ba mundu”
“Prezidente husu ba ha’u atu agradese ba povu tomak liuliu ba joven sira, tanba durante loron hirak ne’ebé ita halo selebrasaun, la akontese buat ida,” PM Xanana Gusmão hateten ba jornalista sira hafoin enkontru ho Xefe Estadu iha Palásiu Prezidensiál Nicolau Lobato, Bairru Pite.
Xanana dehan, Prezidente Repúblika mós haksolok tebes ho atitude sidadun sira-nian, liuliu oinsá Timor-Leste bele hatudu imajen di’ak ba vizitante estranjeiru sira-ne’ebé mai barak hodi akompaña selebrasaun sira-ne’e.
Estabilidade ne’e sai hanesan reflesaun boot ba loron restaurasaun independénsia da-24 hodi hametin dame no dezenvolvimentu nasaun ne’e nian.
Jornalista : Hortêncio Sanchez
Editór : Cancio Ximenes
