VIKEKE, 21 Maiu 2026 (TATOLI)—Diretór Servisu Saúde Munisípiu (SSM) Vikeke, Aljaksono Maia Soares klarifika, kona-ba akontesimentu semana kotuk abitante Aldeia Ulusu, Suku Matahoi, Postu Administrativu Uatulari ko’us pasiente ida-ne’ebé moras bá fasilidade saúde.
“Tanba ne’e ami hakarak klarifika ba públiku katak iha momentu semana kotuk karreta multifunsaun ne’e labele ba tula pasiente iha Ulusu tanba karreta Multifunsaun Uatolari lori bá Dili hodi halo Manutensaun tanba trasaun/rotora aat,” Aljaksono Maia Soares ba TATOLI iha resintu Administrasaun Munisípiu Vikeke, Kinta ne’e.
Maibé, nia dehan, liga ba atendimentu servisu saúde kontinua fó atendimentu no iha postu saúde Ulusu iha pesoal saúde kompostu husi enfermeiru no parteira destaka ne’ebá hodi atende ba komunidade.
“Públiku nia lamentasaun sira-ne’e laloos tanba ita-nia pesoal saúde iha ne’ebá no pesoál saúde mós ne’ebá. Iha loron pasiente Américo Ximenes moras ne’e, Sesta (15/05/2026), pesoál saúde husi Postu Ulusu ba partisipa enkontru iha sentru saúde. Pasiente Américo família lori to’o iha Sentru Saude Uatolari hetan ona asistensia saúde no transfere ona ba Sentru Saúde Internamentu Vikeke,” nia subliña.
Nia mós hateten liga ba ai-moruk báziku sira iha postu saúde ne’e la falta no laiha razaun dehan ai-moruk laiha. Ai-moruk sira hanesan parasetamól, vítima, soru no ai-moruk sira seluk. Kuandu atendimentu iha postu saúde labele, sei lori bá sentru saúde no internamentu.
Aljaksono husu komunidade Munisípiu Vikeke bá-oin akontese nafatin hanesan ne’e koopera hamutuk ho servisu saúde sira oinsá fasilita pasiente bá fasilidade saúde sira hodi hetan tratamentu.
Jornalista: Vitorino Lopes da Costa
Editór: Xisto Freitas da Piedade
