DILI, 22 Maiu 2026 (TATOLI)—Lian hakilar husi adeptu sira iha Estádiu Munisipál Dili nia laran ne’e, tekir-tekir nonook lia laek. Ema hotu-hotu hamriik hanesan estátua klamar laek.
Tanbsá? Iha minutu 65 ne’e, jogadór husi Karketu FC (7), Angenuco Viegas, simu bola iha liña laran hafoin nia dribla defeza rua (2) xutu ho ain loos, bola semo lais tama liu rede AS Marca nian.
Notísia Relevante: Karketu hahú rekolla pontu tolu dahuluk iha Liga 2026
Golu ne’e duni hanesan golu seluk maibé ida-ne’ebé halo torpida kalma mak jestu ne’ebé sai husi Angenuco bainhira nia selebra golu ne’e ho hakmatek halai loke liman no tau limanfuan-hatudu iha nia ibun ho sinal katak silensiu ou nonok, Nia selebra golu, hanesan loos jogadór husi Barcelona Lamine Yamal bainhira hatama golu tau limanfuan-hatudu iha ibun.
Golu Angenuco nian ne’e, totál golu rua hodi lori Karketu nia vitória, Estádiu Munisipál Dili mak sai sasin ba jogadór ho idade tinan 24 ne’e.
Adeptu sira iha estádiu laran hamosu lian barullu, maibé Angenuco nafatin hamriik metin iha kampu nia ninin, iha jogu ne’ebé hala’o kinta kalan, hanesan jogu abertura ba Liga Futeból Timor-Leste époka 2026.
Angenuco, nia mak jogadór isin morenu, fuk nakdulas, isin lotuk no utiluza núneru kamijola (7). Nia jogadór simplis ida, homan nia talentu iha Munisípiu Vikeke iha tinan hira ba kotuk iha klube ida naran Vilamar.
Vilamar mak klube ne’ebé hahoris nia koñesimentu, oinsá sai jogadór di’ak iha mundu futeból, tanba futeból sai ona toman ida ba Angenuco.
“Ha’u sente kontente tanba joga ho Karketu, iha jogu ne’e ha’u hatama kedan golu rua (2), ida-ne’e privileiju ida mai ha’u. Ha’u-nia selebrasi nonook ne’e hanesan toman ida mai ha’u katak, maske ita bele halo buat hotu maibé nafatin nonook husik rezultadu mak barullu,” Angenuco hateten ba TATOLI iha Estádiu, Dili.
Husi kiik mehi ona hakarak joga iha klube kapitál Dili nian ho naran istimadu Karketu Dili FC, ho esforsu ne’ebé iha Angenuco realiza duni mehi ne’e.
“Ha’u sei kiik kedan, hakarak joga loos iha Karektu, agradese loos ohin ha’u nia mehi sai realidade. Ha’u sei esforsu-an sai jogadór di’ak iha klube ne’e,” Angenuco hateten ho oin midar.
Hanesan ai-fuan monu la dook husi nia hun, nune’e mós nakait ba jogadór avansadu Karketu Dili FC Angenuco Viegas, dezde kiik hakarak sai jogadór tanba nia Papa uluk hanesan mós jogadór futeból.
“Ha’u kiik kedan gosta hal-mar bola tanba ha’u-nia aman mós jogadór, nia la joga iha selesaun maibé nia joga iha tempu Indonézia nian,” Anuku haktuir.
Koñese Angenuco
Naran kompletu Angenuco Viegas, moris iha Munisipiu Vikeke iha loron 22 fulan-Juñu 2002. Oan husi inan-aman Agustinho Carmo no Hermengilda Viegas.
Angenuco iha maun alin hamutuyk na’in-haat (4), feto rua (2) no mane rua (2) no Angenuco hanesan oan ba datoluk (3).
Tanba ne’e, jogadór ne’e promete sei esforsu-an hatudu prestasaun di’ak iha liga époka 2026 hodi nune’e realiza mehi ikus tama ba selesaun nasionál.
Kareira iha mundu futeból
Iha tinan 2015-2020, nia joga iha klube Vilamar Vikeke. Iha 2021, nia joga iha klube segunda divizaun LFTL FIEL FC.
Iha tinan 2024, nia joga iha klube primeira divizaun LFTL Emmanuel FC. Iha tinan 2026, nia joga iha Karketu Dili FC no durante joga iha klube hotu ninia pozisaun hanesan avansadu.
Nivel edukasaun
Angenuco hahú eskola primaria iha Vikeke iha tinan 2008 no ramata nia estudu sekundariu iha tinan 2020.
Bainhira remata ensinu Sekundariu iha Vikeke, Angenuco kontinua mai Dili iha tinan 2021 hodi kontinua nia estudu iha Universidade da Paz (UNPAZ).
Iha UNPAZ, Angenuco kontinua estudu iha fakuldade Téknolojia Agrikóla no departamentu observasaun rekursu naturál no ramata ona iha tinan 2024.
Jornalista : Hortêncio Sanchez
Editór : Cancio Ximenes
