DILI, 22 Maiu 2026 (TATOLI) – Eskola Ensinu Báziku Filiál (EBF) Fatuhada daudaun ne’e enfrenta problema falta bee-moos hodi difikulta estudante sira atu asegura saneamentu báziku no mantein ijiene iha ambiente eskola.
Koordenadór EBF Siklu 1 no 2 Fatuhada, Zacarias de Conceição, hateten katak maski Governu konstrui ona edifísiu eskola foun ho andar rua no sala hamutuk 16, maibé problema bee-moos sei sai preokupasaun boot ba eskola.
“Ami sei falta bee-moos, ne’ebé difikulta tebes estudante sira bainhira ba sintina,” Zacarias hateten ba TATOLI iha Fatuhada, Dili.
Nia esplika katak fornesimentu bee-moos ba eskola referida mai husi kanalizasaun Saneamentu Dili, maibé bee dala ruma tun no dala ruma laiha, tanba ne’e la sufisiente ba nesesidade estudante sira-nian.
“Parte Saneamentu mai ona hodi haree kondisaun ne’e, maibé to’o agora seidauk rezolve. Tanba ne’e ami husu ba Saneamentu atu tau matan ho regularidade ba fornesimentu bee-moos atu bele garante saúde no ijiene estudante sira-nian,” nia dehan.
Dadaun ne’e, estudante na’in-2,500 mak hala’o aprendizajen iha EBF Fatuhada no manorin hamutuk 30.
Journalista: Camilio de Sousa
Editór: Filomeno Martins
