DILI, 22 Maiu 2026 (TATOLI)—Ekipa Ad SLB Laulara ne’ebé na’in mak Kay Rala Xanana Gusmãl, sesta kalan ne’e, iha Estádiu Munisipál Dili, manán Assalam FC ho golu 3-0 iha Liga Futeból Timor-Leste (LFTL) époka 2026 Primeira Divizaun.
Jogu hahú. Bainhira árbitru fó orientasaun jogu la’o, ekipa rua lansa kedan kontra no atake ba malu tuir tékniku no abiliade ne’ebé iha.
Ekipa SLB halo kontra atake ne’ebé maka’as oinsá atu prodús lalais golu, maibé Assalam la nonok responde ho lais no atu hamate SLB nia jogu.
Ikus Asslam tenke lakon bola iha minutu 12 tanba defeza halo falta hasoru avansadu SLB ikus árbitru foti desizaun fó penalidade. Oportunidade ne’e hanesan momentu osan-mean ida ba SLB tenke ezekuta ho kuidadu.
Penalidade ne’e ezekuta husi jogadór Fazer Hurtado lansa xutu ho ain-loos ho kalma halo guarda rede Assalam halai ba sorin, no ikus bola tama liu rede laran hodi muda kedan rezultadu ba 1-0.
Golu ne’e halo Assalam tenke esforsu maka’as, hasai iis naruk utiliza maneira oioin atu halo empata jogu ne’e, maibé defeza SLB metin no sólidu tebes, Assalam dudu la ba, ikus iha minutu 17 SLB hetan tan oportunidade furak liuhusi jogadór Martinho Belo konsege prodús golu daruak ba SLB hodi muda rezultadu ba 2-0.
Golu ne’e halo Assalam atrapailla liutan, koko muda estratéjia jogu maibé SLB xave metin iha lina defeza, esforsu Assalam nian hela de’it hanesan esforsu.
Assalam halo presaun maka’as, ikus la kontrola lina kotuk no klaran halo SLB atake fila ho fasil atu ultrapasa tama, ikus iha minutu 35, jogadór SLB Jotas Pereira hetan oportunidade hodi marka golu ikus halo rezultadu 3-0. To’o minute ikus preimeira parte nian ho vitoria provizoriu hela ba SLB.
Hakat ba segunda parte, ekipa rua kontinua lansa atake ba malu, maibé SLB domina liu bola kompara ho Assalam, Assalam utiliza forsa hotu atu kombate iha liña hotu-hotu iha kampu laran maibé SLB la fó fatin ba sira atu hakat liu.
Joga dada malu, laiha tan ekipa ida prodús golu, nune’e to’o minutu daruak termina, vitoria prega metin ba SLB hodi xave pontu tolu (3) no Assalam hela ho pontu zero no sofre golu tolu (3).
Jogu ne’e sai mós hanesan momentu espesiál tanba asiste direita husi na’in ba klube SLB Kay Rala Xanana Gusmão ne’ebé partisipa direita hodi asiste jogu no hola ai-fuan fahe ba adeptu sira la haree ba SLB no Assalam ema hotu simu sumu ai-fuan husi lider nasionál ne’e.
Jogu ne’e dirije husi árbitru prinsipál Pedro Carvalho, juiz liña António Carvalho, Paul da Costa no árbitru rezerva Francisco Pereira.
Jornalista : Hortêncio Sanchez
Editór : Cancio Ximenes
