TL- Brazil hametin kooperasaun iha setór edukasaun no justisa
DILI, 22 Maiu 2026 (TATOLI)- Embaixadór Brazil, Ricardo Leal, sesta ne’e, iha Palásiu Prezidensiál Nicolau Lobato, Dili, hasoru malu ho Prezidente Repúblika, José Ramos-Horta, hodi diskute kona-ba kooperasaun bilateral iha setór edukasaun liuliu foka ba dezenvolvimentu lian-portugés no hametin sistema judisiáriu iha rai-laran.
Embaxadór Brazíl, Ricardo Leal, esplika katak Governu nasaun entre rua ne’e iha kompromisu boot atu kontinua servisu hamutuk liuliu iha projetu sira-ne’ebé la’o hela ho Ministériu Edukasaun.
”Buat ne’ebé Brazil halo daudaun ne’e mak foka liu ba reforsa difuzaun lia-portugés nian iha Timor, liuhusi projetu ida-ne’ebé la’o daudaun ona hamutuk ho Ministériu Edukasaun,” Embaixadór Brazíl hateten ba jornalisra sira hafoin ramata enkontru ho Xefe Estadu.
Aleinde setór edukasaun, iha mós kooperasaun iha área legál nian hodi fó apoiu ba setór judisiáriu no Defensoria Públika.
Embaixadór mós temi katak iha posibilidade boot atu estende tan kooperasaun sira-ne’e iha futuru, bazeia ba nesesidade no kbiit husi nasaun rua ne’e.
”Projetu sira seluk ne’ebé la’o hela, hanesan hametin setór judisiáriu, Defensoria Públika, iha mós ipóteze sira atu estende tan kooperasaun ne’ebé sei tetu didi’ak, tantu iha Brazíl ka iha Timor-Leste,” nia tenik.
Nia sublina katak, Prezidente Repúblika manifesta nia mensajén sintonía no amizade ba Brazil, inklui mós agradese ba apoiu ne’ebé Timor-Leste fó ba Brazíl iha planu multinaterál no diplomasia internasionál.
”Mensajen amizade nian no sintonía nian. Bainhira ha’u temi kona-ba planu multinaterál, ha’u temi buat ida ne’ebé importante tebes, no Brazíl sente orgullu boot tanba bele konta ho apoiu husi Timor-Leste iha inisiativa sira ka kazu sira husi Brazíl nian iha planu multinaterál,”nia konklui.
Kooperasaun entre Timor-Leste no Brazil ne’e sai hanesan pilar importante ida ba dezenvolvimentu kapaasitasaun rekursu umanus no mós ba hametin relasaun diplomátika iha ámbitu Komunidade Pais Lian Portugés (CPLP) nian.
Jornalista : Hortêncio Sanchez
Editór : Cancio Ximenes
