DILI, 23 Maiu 2026 (TATOLI) – Vise Primeiru-Ministru, Ministru Koordenadór Asuntu Sosiál, Ministru Abitasaun Komunitária, no atuál Ministru Interinu Ensinu Superiór Siénsia Kultura, Mariano Assanami Sabino, solisita ba Ajénsia Nasionál ba Avaliasaun Akreditasaun Akadémika (ANAAA) atu kontinua eleva kualidade, estandardizasaun akadémika iha Timor-Leste.
Atuál Ministru Interinu Ensinu Superior Siénsia no Kultura, Mariano Assanami Sabino, hateten ANAAA la’ós de’it atu avalia no halo monitorizasaun ba kualidade universidade sira iha Timor, maibé mós atu servisu hamutuk ho mágnifiku reitór sira hodi hasa’e kualidade ensinu ba ita-nia universidade no institutu sira.
“Ita tenke garante infraestrutura no kapasitasaun rekursu dosente atu nune’e, atu produz ita-nia rekursu ne’ebé akreditadu, tanba agora mós ita sai ona membru ASEAN entaun ita presiza envolve no kompete iha rejionál liuliu aula dijitalizasaun”, Governante ne’e hato’o ba jornalista sira iha seremónia inaugurasaun edifísiu foun ANAAA iha Formoza, ohin.
Tanba, nia dehan, Governu iha mós kompromisu atu apoiu universidade sira aleinde públiku maibé mós ba privadu sira, kapasita kualidade no loke odamatan atu investe mós estudante sira husi nasaun estranjeira.
Iha fatin hanesan, Prezidente Konsellu Ezekutivu ANAAA, Xisto Martins, hateten tinan hirak liubá sira okupa hela fatin ida iha Infordepe Balide, ne’ébé maka ladun fó espasu di’ak ba sira hodi halo servisu loroloron.
“Maibé ohin loron ita inaugura ona edifísiu foun ba ANAAA, ami bele hala’o responsabilidade ho di’ak liután liuliu halo monitorizasaun, avaliasaun hodi fó akreditasaun ba ensinu superiór sira iha Timor laran tomak ho objetivu hadi’a kualidade aprendijazen”, Prezidente ANAAA deklara.
Tanba ne’e mak, tuir Dirijente ANAAA ne’e, sira presiza estabelese mekanismu estandarnizasaun ba ensinu superior sira no garante kualidade edukasaun iha Timor.
“Nune’e prosesu avaliasaun ne’e sira halo tuir kada tinan lima, la’ós halo loroloron maibé tuir siklus, maibé to avaliasaun mak universidade ida la kumpri estandarnizasaun normalmente sira sei la hetan valór akreditasaun, entaun sei fó impaktu ba sira-nia universidade rasik”, nia esplika.
Enkuantu reabilitasaun edifísiu foun ba ANAAA ne’e uza Orsamentu Jerál Estadu 2026 ho montante rihun $96, no empreza ne’ebé implementa mak Fraterna, BB ho durasaun fulan-ualu.
Jornalista: Alexandra da Costa
Editór: Rafael Ximenes de A. Belo
