OEKUSI, 25 Maiu 2026 (TATOLI) – Serbisu Rejionál Edukasaun Rejiaun Administrativa Espesiál Oekusi Ambeno (RAEOA), segunda ohin, hasai sirkulár ofisiál ida, hodi informa ba profesór sira eskola hothotu inklui funsionáriu edukasaun tomak, atu labele emite (hasai) deklarasaun husi diresaun hodi asesu kréditu iha banku.
Sirkulár ofisiál ne’ebé Ajénsia Tatoli,I.P asesu, ho númeru referénsia, 24/K.Inf-SRE/RAEOA-TL/2026, hato’o ba dirijente sira nível ensinu hothotu iha territóriu RAEOA no funsionáriu sira iha Serbisu Rejionál Oekusi ho klasifikasaun importante atu kumpre.
“Ho másimu respeitu no konsiderasaun, nu’udar Diretór Rejionál Edukasaun, liuhusi meiu ida-ne’e informa katak hahú fulan-juñu ba oin tinan-2026, ha’u Vincêncio Cono nu’udar responsavel másimu iha Serbisu Rejionál Edukasaun, la disponível ona hodi asina deklarasaun kréditu iha kualker banku, ho razaun, “todan tebes tanba presaun boot psikolojikamente perturba konsentrasaun ba servisu prioridade profesór no funsionáriu nian,” sita iha sirkulár ofisiál ne’ebé asina direita husi Diretór Serbisu edukasaun Oekusi, Vincêncio Cono.
Liuhusi siekulár ne’e, Diretór Serbisu Edukasaun Oekusi, promete sei enkamiña karta koñesimentu ba Prezidente Autoridade RAEOA inklui banku sira iha Oekusi.
“Kumpre informasaun ne’e no ha’u mós sei hakerek karta koñesimentu ida ba Prezidente Autoridade no responsavel banku sira atu bele muda sira-nia kritériu karik presiza deklarasaun, husu mós ba dirijente eskola no responsavel sira atu labele asina deklarasaun ka rekomendasaun kréditu,” nia apela.
Notísia relevante:Edukasaun Oekusi emite sirkulár regula legalizasaun diploma no deklarasaun kréditu
Jornalista: Abílio Elo Nini
Editór: Rafael Ximenes de A. Belo
