OEKUSI, 25 Maiu 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, domingu ne’e tomada pose ona membru órgaun Konsellu-Konsultivu hamutuk ema na’in-43.
Notísia relevante:Ema na’in-43 indikadu nu’udar membru Konsellu-Konsultivu RAEOA, 22 Maiu simu pose
Régio da Cruz, esplika, nomeasaun ba orgaun Konsellu Konsultivu Rejionál ne’e, bazeia dekretu-lei 1/2026 ártigu 16, membru Konsellu Konsultivu kompostu hosi, Prezidente Autoridade RAEOA Sekretáriu no Rejionál na’in-tolu.
Reprezentante sira maka xefe suku, veteranu na’in-rua, setór privadu na’in-rua, intelektuál, juventude, konfisaun relijioza sira, organizasaun igualdade jéneru, partidu politiku neʼebé hetan asentu iha Parlamentu Nasionál, lia-na’in, reprezentante ida hosi Komisáun Funsaun Públika.
Tanba ne’e, nia dehan, Konsellu-Konsultivu ne’e, nia funsionamentu ne’e atu prepara implementasaun podér lokál, bainhira to’o tempu implementa, ema hotu kapasitadu ona, atu bele hala’o kna’ar reprezenta lian povu ho interrese ba suku hothotu no kamada sosiál, polítika ekonómia ba dezenvolvimentu ne’ebé sustentavel no reziliente iha rai ne’e.
“Ohin ne’e, imi na’in-43 lejítima ona, tanba obrigasaun husi lei númeru 3/2014, ne’ebé altera lei númeru 18/2023 no alterasaun lei númru 1/2026, iha artigu 14 kona-ba Konsellu-Konsultivu nu’udar órgaun orgaun administrativa rejionál nian, la’ós Prezidente Autoridade mesak, signifika rejiaun tomak, atu haree aspetu sira kona-ba dezenvolvimentu sosíu-ekonómiku atu haree ba oin, haree ita-nia rai furak ba futuru, tanba ita hakarak prosesu dezenvolvimentu ne’e, inspiradu mai husi lian povu, sentimentu povu no objetivu povu,” nia hateten iha salaun konvensaun Palaban, domingu ne’e.
Nia hateten, estabelesimentu orgaun Konsellu-Konsultivu ne’e, parte ida ba preparasaun podér lokál, instituisaun ida presiza iha, tan ne’e Oekusi tenki prepara-aan no kapasita aan, tanba orgaun Konsellu-Konsultivu atu apoia autoridade kona-ba promosaun dezenvolvimentu sósiu-ekonómiku iha rejiaun Oekusi.
“Imi mak reprezenta povu nia lian, reprezenta kamada sosiál, politiku, ekonomia, relijioza, kulturál, nune’e bele hatutan no promove nesesidade dezenvolvimentu integradu, inklusiva, ne’ebé ita presiza ba desizaun públiku polítika rejiaun nian no dezenvolvimentu nia rezultadu ho legasi di’ak no povu no rai,” nia hateten.
Notísia relevante:RAEOA sei estabelese Konsellu-Konsultivu atu reforsa polítika Prezidente Autoridade
Tuir nia, definisaun Konsellu-Konsultivu ne’e bazea dekretu-lei númeru 1/2026, prevista iha ártigu 14, katak, Konsellu Konsultivu mak órgaun konsultativu Autoridade mak Prezidente RAEOA.
Ho nia misaun, bazeia diploma ministeriál 51/2016, prevista iha ártigu 3, atu promove partisipasaun ajente sosiál no forsa ativa lokál iha prosesu formulasaun, diskusaun no ezekusaun instrumentu planeamentu estratéjiku autoridade munisipál, akompaña no avalia prestasaun bens no serbisu públiku autoridade rejionál ba sidadaun sira.
“Ha’u-nia esperansa katak, buat estratéjiku ruma iha RAEOA, presiza konsulta ba malu, órgaun Konsellu-Konsultivu kontribui ideia, tanba imi mak reprezenta povu, buat ne’ebé estratéjiku nesesidade importante ba povu fó hanoin nafatin ba ukun na’in-sira iha RAEOA ne’e,” nia hakotu.
Jornalista: Abílio Elo Nini
Editór: Rafael Ximenes de A. Belo
