OEKUSI, 08 Jullu 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio Serventes Roméia da Cruz Salu, kuarta ne’e hala’o enkontru kortézia ho Embaxadora Xina iha Timor-Leste, Wang Wenli hodi diskute kona-ba futuru kooerasaun ba dezenvolvimentu agro-floresta.
Prezidente Autoridade Régio da Cruz Salu, via WhatsApp ba Ajénsia Tatoli,I.P esplika katak, sorumutu ne’e hala’o iha Embaxada Xina iha Aitarak-Laran Dili, ohin.
Nia informa, katak, enkontru ne’e autorizadu, tanba antes ne’e nia hato’o karta pedidu autorizasaun ba Entidade Tuteladu Superentendente RAEOA, Primeiru-Ministru (PM), Kay Rala Xanana Gusmão, atu kontinua diskusaun ne’e tanba antes ne’e parte rua inísia diskusaun relasaun ho polítika Governu Timor-Leste ho Governu Xina, iha kooperasaun di’ak tanba Oekusi nu’udar rai enklave ida iha Timor-Leste.
“Diskusaun inísia iha tinan kotuk, ami ko’alia kona-ba kapasitasaun rekursu umanu, asuntu agro-floresta, indústria transformativa liliu kreativa, hanesan Bambu, Ai-Kameli no iha dezenvolvimentu ba investimentu ekaliptu ka minyak kayu putih, ne’ebé antes ne’e mós ha’u aprezenta ona ita-nia parseiru ida ba Embaxadora Xina kona-ba asuntu ne’e, ne’ebé enkontru ne’e hanesan full-up husi tinan kotuk,” nia hateten liuhusi whatsApp ba Ajénsia Tatoli,I.P, ohin.
Tanba ne’e, nia dehan, iha enkontru ohin interresante tebes Embaxadora Xina, hateten atu konvida Governu Timor-Leste espesialmente ba Oekusi, atu bele haree esperiénsia dezenvolvimentu zona ekonomia fronteira, ne’ebé Governu Xina halo ona ho nasaun tolu iha ASEAN nian, ne’ebé fronteira direita ho Xina iha parte free trade zone (zona komérsiu livre), tanba viziñu maibé ekonomikamente sira kria kooperasaun di’ak sai fonte ekonomia.
Dirijente ne’e informa, durante iha enkontru ne’e, Embaxadora Xina, hateten katak, sei iha interrese husi Governu liuhusi Autoridade RAEOA, sira bele fasilita hodi fahe esperiénsia ne’e ba ita, bainhira ita iha hanoin hamutuk atu realiza iha fronteira ho Indonézia liliu iha populasaun fronteira rai rua nian, atu haforsa inspirasaun hodi fó benefísiu ba malu iha parte ekonomia,” nia hateten.
“Ida ne’e maka ohin diskusaun, Governu Xina liuhusi Embaxadora Xina deklara posibilidade atu ajuda nafatin Governu Timor-Leste nia nesesidade atu haree mós ba área enerjia renovavel tanba kestaun lojístiku no supplay (fornesimentu) sira, ne’ebé ohin loron sai problemátiku nesesidade ba enerjia, ne’e sai preokupasaun ida, ne’ebé dehan, sé Governu Timor-Leste interese ba apoia ne’e, sira sei kanaliza sira-nia apoia atu halo investimentu iha Oekusi liuhusi sira-nia finanseiru rasik,” nia haktuir.
Notísia relevante:Empreza Brilliant Holdings husi Honkong hakarak investe rekursu minerál iha Oekusi
Tanba ne’e, hanesan Prezidente simu no apoia polítika, maibé sei relata fali ba Entidade Tuteladu Superentende RAEOA Primeiru-Ministru, atu haree no posibilidade duni atu aproveita polítika ne’e, nune’e bele halo poupansa no buka alternativa ida-ne’ebé fó benefísiu ba nesesidade dezenvolvimentu sira tuirmai, ne’ebé ho eskala ligadu ba investimentu zona ekonomia espesiál Oekusi nian.
“Ha’u hanoin sei akontese uluk maka industria transformativa bambu, tanba tinan rua liuba, Governu Xina fasilita ona kapasitasaun ba funsionáriu husi Oekusi ba aprende iha Xina, ne’ebé diskusaun ohin kontinuasaun ba kooperasaun uluk halo ona, agora atu buka forma ida atu iha nível implementasaun modelu ne’e ba kontestu RAEOA nian,” nia hateten.
Jornalista: Abílio Elo Nini
Editór: Rafael Ximenes de A. Belo
