OEKUSI, 26 Novembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, kuarta ohin, organiza enkontru konvokatóriu ho autoridade komunitáriu no lia-na’in sira, no jestór sub-rejiaun haat atu halo diskusaun hodi estabelese membru Konsellu-Konsultivu.
Tuir Régio Salu, objetivu husi estebelesimentu membru Konellu-Konsultivu ne’e, hodi kontribui ideia atu haforsa desizaun no promove liña koordenasaun ho Prezidente Autoridade RAEOA.
“Iha lei númeru 3/2014, iha artigu 24.o, prevista kona-ba Konsellu-Konsultivu RAEOA, Konsellu-Konsultivu ne’e ba Prezidente Autoridade atu-bele tetu buat ruma, antes deside deliberasaun ida kona-ba desizaun polítika administrativa, institusionál Governu nian,” Régio Salu dehan, iha salaun alfandega Palaban, ohin.
Notísia relevante:Rogério Lobato sei harii konsellu konsultivu hodi mellora prestasaun servisu
Autoridade ne’e promete katak, maske mandatu hela fulan ida de’it, maibé sei esforsa atu estabelese, tanba hetan autorizasaun husi Primeiru-Ministru, nu’udar entidade tuteladu, iha fulan kotuk autoriza ona atu reativa.
Tanba iha mandatu Autoridade Sesante la konsege funsiona Konsellu-Konsultivu, tanba tempu mak ami seidauk realiza primeiru enkontru konvokatóriu tanba presiza mós Primeiru-Ministru atu nomea reprezentante ida husi Primeiru-Ministru mai Konsellu-Konsultivu ne’ebé tuir lei.
“Entaun ohin ami halo primeira enkontru simboliku, atu informa no husu xefe suku sira, atu nomeia ema ida, reprezenta suku 20 iha Oekusi atu sai membru Konsellu-Konsultivu. Ami konkorda ona katak, iha loron 01 Dezembru 2025, durante prezensa Primeiru-Ministru, ami mós sei realiza segundu enkontru simbóliku ho membru Konsellu-Konsultivu, nune’e husu Primeiru-Ministru atu indika ema ida nu’udar reprezentante, ne’ebé antes to’o tinan foun ita sei realiza enkontru konvokatóriu membru Konsellu-Konsultivu RAEOA nian,” nia informa.
Iha biban ne’e, Xefe suku Costa Francisco Colo, apoia tanba ho polítika ne’e bele hakbiit desizaun sira iha Autoridade RAEOA.
“Ha’u orgullu ho planu ne’ebé Autoridade atu estabelese ekipa ne’e, ho nune’e liña koordenasaun ne’e la mate iha baze, no Autoridade mós iha kbi’it bainhira komunika ho Governu Sentrál, ohin ami suku 20 partisipa másimu iha momentu ne’e, ami konkorda tebes no apoia 100% ba hanoin di’ak ida-ne’e,” nia hateten.
Xefe suku Cunha Domingos Seco Caunan, rekomenda bainhira indika ema ruma, presiza tetu atu labele prejudika desizaun Autoridade RAEOA.
“Apresia tebes atu reativa fali membru Konsellu-Konsultivu iha Oekusi, tanba husi lei mós hateten ona, katak bainhira Prezidente Autoridade iha ona desizaun ruma, presiza mós hanoin ruma husi membru sira-ne’e, maibé ha’u só rekomenda de’it, bainhira delega ema sira-ne’eb’e atu tama membru, tenki haree didi’ak, atu bainhira iha enkontru membru Konsellu-Konsultivu fó hanoin ida-ne’ebé kapa’as liga ba nesesidade públiku nian, labele ho hanoin ida intensaun polítika ka hanoin partikulár, no labele iha diskriminasaun maibé la ho hanoin ba komun, tanba ema sira-ne’e sei mai husi xefe suku, lia-na’in no jestór inklui instituisaun seluk tan,” nia fó hanoin.
Notísia relevante:Arsénio Bano fó pose ba Konsellu Konsultivu na’in-hitu
Entretantu, Konsellu-Konsultivu RAEOA mak órgaun rejionál ho natureza konsulta, tuir artigu 15.º n.º 2, Lei n.º 18/2023 (3.ª alterasaun Lei n.º 3/2014) no artigu 11.º no 26.º, DL n.º 5/2015.
Tuír artigu 23.º-24.º Lei n.º 18/2023 no artigu 28.9-30.º DL 5/2015, Konsellu-Konsultivu nia kompeténsia sira mak; Prezidente Autoridade tenke konsulta Konsellu-Konsultivu molok simu desizaun importante no molok propoin regulamentu administrativu, apoia prosesu orsamentál, halo pareser kona-ba ezekusaun, emite rekomendasaun, informasaun no relatóriu kona-ba matéria interesse Rejiaun.
Nune’e kompozisaun Konsellu-Konsultivu (artigu 24.º Lei 18/2023); prezidente Autoridade (preside), representante Primeiru-Ministru, lia-na’in ida husi Oekusi, xefe suku ida (indika hosi xefe sira), membru forsa seguransa ida (indika hosi Ministru Interiór), representante munisípiu sira (Nítibe, Oésilo, Pante Makasar no Pássabe), to’o munisípiu sira la instala kompletu, Konsellu-Konsultivu la presiza simu reprezentante munisípiu ne’ebé prevista iha artigu 42.º.
Jornalista: Abílio Elo Nini
Editór: Rafael Ximenes de A. Belo
