BOBONARU, 25 Maiu 2026 (TATOLI) – Populasuan sira husu ba Governu atu halo reabilitasaun ba kampu aviasaun iha eis-Kodim, iha suku Ritabou, postu administrativu Maliana, munisípiu Bobonaru, tanba daudaun karreta no motór mak halo movimentu, inklui animál.
Rosita Amaral, rezidente Maliana relata katak kampu aviasaun ne’e komunidade uza ba treinu karreta no motór.
“Kampu ida-ne’e halo dezde tempu Indonézia. Governu seidauk tau-matan, du’ut mak nakonu, loroloron aviaun tun más ema, karreta, motór, no animál iha laran nakonu. Muru aat hotu tiha, depois aviaun nia dalan mós fatuk-mutin rahun mak iha laran. Ida-ne’e bele difikulta aviaun tun”, nia informa ba Tatoli, ohin.
Membru komunidade seluk, Vítor de Jesus, reforsa katak iha tinan 2023, Autoridade Postu Administrativu Maliana liuhusi Programa Mão de Obra Postu Administrativu (PMOPA) halo ona lutu hale’u kampu aviasaun ne’e, maibé agora hetan danus husi animál no ema deskoñesidu.
“Se bele halo muru hale’u tiha, ema jaga mós iha para labele akontese tan hanesan ne’e. Aviaun ne’e presiza fatin ida espesiál ba nia de’it, la’ós ema, animál, karreta ho motór mós bá-mai”, nia lamenta.
Diretór-Ezekutivu Ospitál Referénsia Maliana, José Marçal da Cruz, dehan problema ne’e difikulta tebes aviaun atu tula pasiente ba Ospitál Nasionál Guido Valadares, Dili, ho emerjénsia.
Daudaun ne’e Aviasaun Sivíl Timor-Leste kontrata ona pesóal seguransa na’in-rua halo kontrolu iha terrenu molok aviaun tun no semo.
Lembra katak, iha loron 28 Abríl 2026, ekipa Aviasaun Sivíl Timor-Leste halo ona enkontru ho Prezidente Autoridade Munisípiu Bobonaru, Paulo Moniz Maia, hodi relata planu atu halo reabilitasaun ba kampu aviasaun iha tinan ne’e.
Jornalista: Sergio da Cruz
Editora:Maria Auxiliadora
