DÍLI, 25 Maiu 2026 (TATOLI) – Diretór Luta Hamutuk, José da Costa Alves, husu ba sidadaun Timoroan atu valoriza no apoia negósiante Timoroan, no labele hakribi malu tanba ida-ne’e bele hafraku dezenvolvimentu ekonomia família no nasaun.
José hateten katak Luta Hamutuk observa durante ne’e katak iha sidadaun barak ne’ebé seidauk fó apoiu másimu ba negósiu ki’ik Timoroan, no dala barak la fó valór ba produtu no servisu ne’ebé Timoroan rasik oferese.
“Luta Hamutuk observa katak sidadaun balu hakribi malu bainhira halo negósiu ki’ik no la valoriza Timoroan sira-nia esforsu rasik. Situasaun ida-ne’e bele halo negósiu sira la lao ho dignidade, no ikus mai taka. Ida-ne’e fó impaktu ba dezempregu,” dehan José da Costa Alves ba jornalista sira iha nia servisu-fatin iha Palapasu, Díli.
Nia esplika katak atualmente Timoroan barak hahú negósiu ki’ik hanesan restaurante, kios, faan ai-fuan, no atividade komersiál seluk. Maibé, balu la kleur taka tanba menus konsumidór no falta apoiu husi komunidade rasik.
José fó ezemplu katak iha restaurante barak ne’ebé loke husi Timoroan, maibé sidadaun balu prefere ba han iha restaurante estranjeiru sira duké apoia negósiu lokal.
“Ita dala barak lakohi ba sosa ka han iha Timoroan sira-nia restaurante, tanba konsidera menus kualidade. Maibé ita hili de’it fatin sira ne’ebé ema estranjeiru mak jere. Ida-ne’e bele halo negósiu Timoroan la dura no taka tanba rendimentu menus,” nia hateten.
Atu responde ba dezafiu ne’e, Luta Hamutuk husu ba Governu atu reforsa kontrolu ba atividade negósiu sira, liuliu negósiu ki’ik ne’ebé Timoroan bele dezenvolve rasik.
Organizasaun ne’e apela mós ba komunidade atu hadomi no valoriza produtu lokál, no fó apoiu ba negósiante Timoroan hodi hametin ekonomia família, kria oportunidade servisu no kontribui ba dezenvolvimentu ekonomia nasaun.
“Se ita apoia malu no sosa produtu Timor oan nian, ita la’o hamutuk hodi hametin ekonomia família no ekonomia nasional,” José konklui.
Jornalista: Camilio de Sousa
Editór: Filomeno Martins
