DILI, 25 Maiu 2026 (TATOLI)–Ekipa promovidu Segunda Divizaun Vila Atauru FC prontu atu enfrenta jogu ho ekipa antigu Segunda Divizaun FIEL FC iha jogu abertura Liga Futeból Timor-Leste (LFTL) ne’ebé sei realiza iha tersa (26 Maiu 2026) iha Estádiu Munisipál Dili.
“Ami hanesan ekipa foun foin mak promove sa’e mai Segunda Divizaun, ami-nia grupu kona loos ho ekipa ida-ne’ebé antigu ona iha Segunda Divizaun. Ami mai ne’e preparadu atu kompete,” Treinadór Vila Atauru FC, Florindo Fereira, hateten ba jornalista sira iha Estádiu Munisipál Dili, ohin.
Ni dehan, Vila Atauru FC mai ona ho forsa ne’ebé naton hodi kompete no iha mehi atu ultrapasa ba Primeira Divizaun iha tinan oin.
Iha fatin hanesan, Prezidente klube Vila Atauru FC, Jojo Neves, hateten kondisaun klube prepara ho di’ak maske jogadór sira foin mak hamutuk seidauk to’o semana maibé Atauru optimista hakarak manán jogu hodi hetan pontu tolu (3) iha jogu dahuluk.
“Ami-nia ekipamentu hotu di’ak no kompletu. Maske ami-nia preparasaun ba jogadór sira foin mak kompleta iha loron haat liu ba, maibé ami preparadu,” nia dehan.
Nia afirma, jogadór hotu 80% mai husi Atauru ho objetivu atu prepara jogadór Atauru-oan hotu ne’ebé iha talentu ba futeból.
Iha fatin hanesan, Kapitaun ekipa, Hasan Ramos, reforsa tan katak, hasoru FIEL hanesan meiu ida mós atu koko Atauru nia forsa hodi avansa ba oin.
“Ami kontente tebes atu hasoru FIEL. Sira ekipa tuan iha Liga Segunda Divizaun, hasoru sira hanesan oportunidade ida hodi hadi’a ami-nia frakeza karik iha. Kolaborasaun entre ami jogadór sira másimu ona,” Hasan tenik.
Daudaun ne’e Atauru sosa ona jogadór estranjeiru na’in-haat hodi reforsa ekipa referidu, jogadór na’in-haat ne’e mai husi Indonézia Papua.
“Ami iha jogadór estranjeiru husi Indonézia na’in-haat, sira husi Papua, maibé restu ne’e husi Atauru. Ami hakarak promove jogadór Atauru-oan sira-ne’ebé iha talentu,” Hasan dehan.
Iha sorin seluk, treinadór FIEL Herminio José Pereira, hateten Vila Atauru FC nu’udar ekipa ida-ne’ebé foin mak promove ba Segunda Divizaun no FIEL respeita no rekoñese ekipa ne’e mai ho matéria jogadór ne’ebé di’ak no rezultadu jogu minutu 90 mak sei determina iha kampu.
“Ita hatene Vila Atauru, ekipa-ida ne’ebé mai ho matéria jogadór di’ak. Sira mai ho jogadór estranjeiru, maibé buat hotu la sai hanesan sasukat ida mai ami. Ami-nia preparasaun durante ne’e la’o ho di’ak, ami prontu atu hasoru sira,” treinadór ne’e tenik.
Nia dehan, FIEL mai ho jogadór lokál husi Munisípiu tanba FIEL mai ho moto hakarak promove jogadór lokál prinsipál liu ba jogadór iha área rurál ne’ebé ladun hetan oportunidade di’ak tama iha klube sira hodi kompete iha liga Timor-Leste nian.
“Ekipa hotu ne’ebé kompete iha Segunda Divizaun mai ho esperansa ida katak atu manán, maibé ami ekipa tuan iha Segunda Divizaun, ami preparadu, ita bele planu ho hanoin ne’ebé di’ak, maibé buat hotu iha jogu mak sei determina,” nia hateten.
FIEL iha époka ida-ne’e ho mehi no ambisaun boot hakarak promove ba Primeira Divizaun maibé, buat hotu sei liu husi prosesu no esforsu.
Jornalista : Hortêncio Sanchez
Editór : Cancio Ximenes
