KOVALIMA , 26 Maiu 2026- Prezidente Autoridade Munisípiu Kovalima, Miguel Armada Cardoso, hamutuk ho diretór servisu Munisipál , tun ba tereñu hodi observa direta no halo levantamentu dadus ba komunidade ne’ebé afetadu inundasaun , tanba kauza husi udan-boot ne’ebé akontese, iha munisípiu Kovalima.
Autoridade Kovalima ne’e dehan, durante iha tereñu ekipa identifika katak kauza husi inundasaun tanba husi bee dalan kloot iha área autoestrada nian, ho nune’e halo udan been la suli liu ba tasi, be’e sa’e fali hodi fó impkatu no estraga komunidade sira-nia uma no sasán sira hotu.
“ Bee dalan iha parte autoestrada nian klo’ot liu, tanba uza de’it anilla, ho nune’e bee labele sai liu, rai henek, fatuk ai rohan sira nakonu, bee fila fali ba komunidade nia leet. Tanba ida ne’e ami koko hanoin hela Autoestrada iha área Beco nian, presiza ko’a halo fila fali ponte, hodi nune’e bele normaliza bee dalan, liu ba Tasi, se la’e kada tinan ita labele rezolve inundasaun” ,PAM Kovalima Miguel Armada Cardoso, hato’o hafoin halo observasaun inundasaun iha Kovalima.
Durante udan-boot ne’ebé akontese iha Munisípiu Kovalima Prezidente Autoridade Munisípiu Kovalima halo observasaun iha fatin sira hanesan iha Postu Suai Suku Beko, Postu Zumalai Suku Tashilin, Postu Tilomar Aldeia Kulit, hafoin identifika, ekipa direta foti dadus hodi relata ba governu sentrál, atu hetan apoia no foti medida.
Relasiona inundasaun ne’ebé akontese iha Kovalima, Autoridade Kovalima apela ba komunidade no entidade hotu katak bazeia ba sirkulasaun ne’ebé hasai ona bandu komunidade sira halo toos no konatrui uma iha mota ninin
Tuir dadus durante udan iha Kovalima Uma kain-34 husi Suku Tashilin postu administrativu Zumalai , mak afeitadu ba inundasaun tanba kauza husi korenti mota ho naran Huunetel.
Iha fatin hanesan, Komunidade afeitadu inundasaun João Freitas, informa katak,Inundasaun mosu tanba afeitadu husi autoestrada halo mota labele liu ba sorin knaal bee autoridade intupidu labele akumula bee mota bainhira korenti mota boot hodi suli fali ba Bairru laran hodi estrada komunidade nia sasan
“ Ami nia sasan uma laran sira estraga hotu hanesan armári no aihan sira,animal no dokumentu bee lori hotu kedas ami la’o ho liman mamuk”.nia dehan.
Jornalista: Celestina Teles
Editór: Florencio Miranda Ximenes
