DILI, 26 Maiu 2026 (TATOLI)—Embaixadór Timor-Leste ba Koreia Súl, António de Sá Benevides, tersa ne’e, iha Palásiu Prezidensiál Nicolau Lobato Dili, hasoru malu ho Prezidente Repúblika, José Ramos-Horta, hodi relata progresu servisu sira-ne’ebé hala’o iha Koreia Súl.
“Ha’u mai hasoru Prezidente Repúblika atu partilla de’it informasaun kona-ba ha’u-nia servisu ne’ebé halo iha Koreia besik tinan ida ho balun ona iha ne’ebá. Nomós esplika uituan kona-ba planu ne’ebé atu halo iha tinan oin nian,” Embaixadór ne’e informa ba jornalista sira hafoin hala’o enkontru ho Xefe Estadu.
Iha okaziaun ne’e, nia esplika katak antes dezloka ba Koreia Súl iha fulan-Outubru tinan 2024, Xefe Estadu fó ona instrusaun klaru hodi hakbesik an ba universidade sira iha ne’ebá.
“Prezidente fó instrusaun mai haú atu hakbesik an ba universidade sira iha Koreia nian, hodi bele ajuda partilla informasaun ba ita-nia estudante sira iha Koreia. Entaun ida-ne’e ha’u-nia servisu, ha’u mai hato’o kona-ba ida-ne’e,” nia tenik.
Aleinde ne’e, embaixada mós kontinua halo koordenasaun besik ho Adidu traballu husi Sekretária Estadu Formasaun Profesionál no Empregu (SEFOPE) hodi akompaña no tau matan ba situasaun traballadór timoroan sira-nian iha ne’ebá.
Iha sorumutu ne’e, parte embaixada mós hato’o kona-ba planu vizita tempu badak husi Ministru Negósiu Estranjeiru no Kooperasaun (MNEK) ba Koreia Súl, inklui foti kestaun kona-ba posibilidade vizita estadu husi Prezidente Repúblika ba Korea.
Hatan ba kestaun sira-ne’e, Xefe Estadu manifesta nia prontidaun hodi fó apoiu tomak ba servisu diplomátiku nian.
“Prezidente mós husu atu bele servisu hamutuk ho kanál sira ne’ebé iha ligasaun ho ida ne’e. Nia mós informa mai haú katak iha tempu badak nia laran, nia sei liga ba nia maluk sira ne’ebé servisu iha Koreia para atu bele servisu hamutuk ho ekipa embaixada,” nia dehan.
Jornalista : Hortêncio Sanchez
Editór : Cancio Ximenes
