DILI, 26 Maiu 2026 (TATOLI)—Prezidente Repúblika, José Ramos-Horta, tersa ne’e, simu delegasaun husi Institutu Peskiza Ekonómika ba ASEAN no Azia Orientál (ERIA) hodi konvida formalmente Xefe Estadu atu sai oradór distintu ba da-haat (IV) hato’o nia Palestra Lideransa (Leadership Lecture) ne’ebé sei hala’o iha 02 Juñu 2026 iha Jakarta, Indonézia.
Prezidente simu ona konvite ne’e ho haksolok, hodi hamutuk ho grupu elite oradór anteriór sira-ne’ebé inklui mós antigu líder sira husi Indonézia, Kamboja no Tailándia.
Xefe delegasaun husi Institutu Peskiza Ekonómika ba ASEAN no Azia Orientál (ERIA), Nobuhiro Aizawa, hateten hili Prezidente Ramos-Horta espesifikamente tanba ninia impaktu boot ba pás no rekonsiliasaun rejionál.
“Hili mós Prezidente Ramos-Horta tanba iha kbiit intelektuál no vizaun ba oin nu’udar kontribuisaun esensiál ba estabilidade rejionál, liuliu iha krize jeopolítika mundiál nia klaran,” Nobuhiro Aizawa hateten ba jormalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, ohin.
Nia dehan, ERIA hakarak hatudu Timor-Leste nia jornada susesu iha konstrusaun Estadu nian nu’udar modelu dignidade no reziliénsia ba rai sira seluk iha Sudeste Aziátiku.
Durante enkontru ne’e, delegasaun nota katak Prezidente nia hanoin sira sei iha valór tebes ba aborda kestaun rejionál ne’ebé kompleksu, hanesan krize ne’ebé kontinua akontese iha Myanmar.
Palestra ne’ebé sei akontese iha Jakarta ne’e reprezenta oportunidade signifikativu ida atu fahe esperiénsia úniku Timor-Leste nian iha rezolusaun konflitu ba audiénsia internasionál ne’ebé luan liu, hodi hametin liután nasaun ne’e nia papél nu’udar lian ida-ne’ebé influénsia iha komunidade ASEAN nia laran.
Jornalista : Hortêncio Sanchez
Editór : Cancio Ximenes
