Euforia husi adeptu lori AC Mamura konkista vitoria iha jogu dahuluk LFTL 2026
DILI, 26 Maiu 2026 (TATOLI)—Euforia mai husi lian latina ho nia signifikadu katak haksolok ho emosionál, ida-ne’e mak hatudu husi adeptu AC Mamura iha Estádiu Munisipál Dili hodi fó apoiu másimu ba sira-nia ekipa favoritu AC Mamura hodi gaiña vitória dahuluk iha Liga Futeból Timor-Leste (LFTL) Segunda Divizaun 2026.
Notísia Relevante:
Jogu ba ekipa rua (2) hala’o iha Estádiu Munisipál Dili, tersa kalan. Iha fatin ne’e duni fó sasin ba ema hotu katak Mamura manán no manán tebes duni.
Euforia husi adeptu sira mai ho versaun oioin, balun baku tambór, balun haklalak, balun huu korneta fó apoiaa másima halo jogadór sira-nia vontade jogu hetok maka’as liután.
Iha kalan ne’e, lampu Estádiu fó naroman, fó nabilan hanesan loromatan ida fó nia roman iha tempu kalan, ema hanoin tempu mak muda, maibé la’ós, fatin ne’e iha Estádiu Munispál Dili, nakfilak ona ba ema hodi tebe bola iha tempu kalan.
Iha jogu ne’e, ekipa rua mai ho forsa hakarak manán, bainhira minutu ba prieira parte hahú jogadór sira lansa kedan kontra no atake ba malu tuir ida-idaknia tékniku no abilidade.
Academica hatudu nia forsa hanesan ekipa jigante, maibé Mamura joga ho klama maibé la hatudu nia frakeza ba Academica ho liafuan seluk (la fó ulun atu Academica atu sama), loos duni, Mamura la fó nia ulun, nune’e jogadór sira utiliza estratéjia jogu ho maneira oioin.
Estratéjia ne’ebé Mamura halo la hela de’it hanesan estratéjia, maibé konsege hatudu rezultadu tanba iha minutu 23, jogadór Wolter Kalau konsege fura golu ida hodi loke vitória ba Mamura. Golu ne’e halo Academica la nonook, maibé Mamura la fó fatin.
Academica halo atake ho maneira oioin, maibé atake hirak ne’e hela de’it ho atake tanba la hetan oportunidade hodi prodús golu.
Mamura kontinua halo jogu bonitu, utiliza maneira oioin hodi sobu defeza Academica nian, ikus iha minutu 43, jogadór Delivio Lobo marka tan golu daruak hodi xave Mamura nia vitória hodi lori rezultadu ba 2-0.
Golu ne’e halo Academica dada iis naruk, maibé la kolen atu reziste, maibé jogu la’o oras badak de’it ona basa minutu ikus ba primeira parte termina ona, ho nune’e Mamura lidera provizóriu 2-0.
Hakat ba segunda parte, ekipa rua kontinua lansa atake ba malu, Mamura esforsu atu halo golu, maibé laiha ona oportunidade.
Academica haree no estuda situasaun hotu iha kampu laran, nune’e treinadór foti desizaun hodi halo mudansa ba jogu iha parte kalan, husi mudansa ne’e Academica foin hetan loloos sira-nia jogu maibé tarde ona atu manán.
Esforsu hotu Academica halo iha minutu 55, jogadór Sony Aplunggi konsege fura rede Mamura hodi muda rezultadu ba 2-1, golu ne’e halo Academica bele ramata nia sofrimentu, maibé golu ne’e hanesan golu ikus ba ekipa rua tanba to’o jogu termina laiha tan golu ruma, nune’e rezultadu prega metin ba 2-1, Vióoria hela ba Mamura hodi rekolla pontu tolu (3), enkuantu Academica hela ho pontu zero.
Husi vitoria ne’ebé Mamura hetan marka ona istória ba klube husi Kakaulidun Dili ne’e, basa foin promove husi terseira divizaun iha tinan kotuk, konsege manán kedan klube antigu LFTL ne’ebé mai husi Universidade Nacional Timor Lorosa’e ne’e.
Jornalista : Hortêncio Sanchez
Editór : Cancio Ximenes
