BAUKAU, 26 Maiu 2026 (TATOLI)—Prokuradoria Jerál Repúblika liuhusi Ministériu Públiku (MP) sei hato’o rekursu relasiona ho desizaun Tribunál kona-ba kazu peska ilegál.
Ministériu Públiku hato’o intensaun rekursu tanba konsidera desizaun Tribunál Primeira Instánsia Baukau fó-sai kona-ba devolve hikas ró KM Makmur Rejeki ba kompaña na’in iha-ne’ebé objetivu referidu sai parte terseiru ba kazu peska ilegál ne’ebé envolve sidadaun Indonézia hamutuk na’in-32.
MP deklara sei halo rekursu hafoin rona leitura akordaun tanba konsideradu ró KM Makmur Rejeki nu’udár objetivu importante hodi utiliza hala’o atividade ilegál iha tasi Timor nune’e tenke sai patrimóniu Estadu no minimiza kazu peska ilegál iha futuru.
Aleinde ne’e, MP hakarak kontinua halo investigasaun kle’an ba kompañia na’in nune’e deside seidauk devolve evidénsia sira seluk hanesan ekipamentu peska no telefónema tanba konsideradu nu’udár matadalan ba prosesu tuirmai.
Notisia relevante: Tribunál deside pena multa ba arguidu peska ilegál
Antes ne’e, MP alega pena multa variedade ba arguidu sira hanesan kapitaun ró ho pena multa $250 multiplika ba loron 300, elementu ró hamutuk na’in-31 pena multa $150 multiplika ba loron-300 no kompañia responsavel ne’ebé kondena multa $200 multiplika ba loron 350.
Iha alegasaun, Ministériu Públiku mós husu Tribunál atu deside objetivu apreendidu sira hanesan ró, ikan no ekipamentu peska atu Tribunál deklara sai nu’udár patrimóniu Estadu iha-ne’ebé alegasaun sira-ne’e bazeia ba Kódigu Prosesu Penál artigu 219 kona-ba peská ilegál.
Tribunál Primeira Instánsia Baukau rasik liuhusi leitura akordaun razaun fó-fila ró KM Makmur Rejeki ba na’in kompañia tanba konsideradu objetu ne’e nu’udár terseira parte iha dokumentu válidu no laiha koñesimentu ruma atu hala’o atividade ilegál iha territóriu Timor-Leste.
Nune’e, kona-ba ró, Tribunál apenas halo estrasertidaun hodi husu MP hala’o investigasaun ne’ebé autónomu husi kazu peska ilegál relasiona ho responsabilidade pesoál koletiva ka propriedade ba ró referidu.
Entretantu, Tribunál Primeira Instánsia Baukau deside pena multa ba arguidu na’in-32 tuir artigu 75 númeru 2 husi Kódigu Penál iha hanesan kapitaun ro ho valór kada loron $5 husi totál loron 100 nune’e hamutuk $500.
Ba membru ró (ABK-sigla Indonézia) hamutuk na’in-31 Tribunál deside kada pesoál multa kada loron $2 husi totál loron 100 ho valór kada ema hamutuk $200 ne’ebé bainhira la kumpri sei iha pena aternativa hanesan prizaun durante loron 66 bazeia ba Kódigu Prosesu Penál artigu 66.
Jornalista: Natalino Belo
Editór: Xisto Freitas da Piedade
