DILI, 26 Maiu 2026 (TATOLI)—Diretór Servisu Saúde Munisípiu Ermera, António de Fatima, informa iha tinan 2026 ne’e Governu liuhusi Ministeriu Saúde sei konstrui ospitál psikiatra iha Munisípiu Ermera no sai sentru referál ba ema ho problema psikososiál iha Timor-Leste.
“Hanesan munisípiu Ermera, ami hetan ona informasaun katak iha tinan ida-ne’e to’o 2027, ami sei hetan ospitál rua. Dahuluk, ospitál ida ba ema ho problema psikososiál nian iha Suku Fatukero, Postu Administartivu Railaku. Ami mós iha ospitál referál ida iha Suku Dukurai, Postu Administrativu Letefoho, tanba ospitál psikiatra ne’e atu sai mos sentru ba referál psikososiál ba munisípiu 13. Tanba, ita haree ba kapasidade internamentu mental nian iha Laklubar ne’e la bele kobre hotu, tanba ne’e mak ita loke tan iha ne’e nune’e ita buka solusaun mak balun ba iha Laklubar balun mai iha ne’e,” António de Fatima hateten ba jornalista sira iha JL World Metiaut, ohin.
Nia esplika, ospitál referál ne’ebé halo iha Suku Dukurai, Postu Administrativu Letefoho, dahuluk ita mós bele kobre populasaun balun husi Ainaru, Aileu bele mai iha ne’e. Nune’e bele redús taxa mortalidade ba moras sira-ne’ebé mak grave ka balun mate iha dalan banhira seidauk to’o ospital.
Tanba ne’e mak objetivu husi MS harii ospital iha ne’eba, atu fó benifisiiu tebes ba populasaun Atsabe, Letefoho, nune’e sira bele asesu saúde iha ne’eba.
“Husi munisipiu Ermera iha suku 50, maibé postu saúde seidauk kobre hotu, foin mak 40 signifika sei kobre tan ba suku ne’ebé mak seidauk hetan, nune’e bele kobre hotu ba populasaun sira hotu, tanba suku balun seidauk hetan postu saúde,” nia relata.
Nia haktuir, kona-ba profisional saúde sira-ne’ebé mak rekruta iha tinan 2025 daudaun ne’e hamutuk 23 ne’ebé tuir formasaun iha HNGV no iha fulan-Maiu ne’e koloka ona mai Ermera.
Husi profisionál saúde hamutuk 23 ne’e kompostu husi médiku na’in-lima (5), parteira na’in-ualu (8), enferemeiru na’in-neen (6), nutrisaun na’in-rua (2) no saúde públika na’in-rua (2).
Sira hirak ne’e, koloka hotu ona bazeia ba mapeamentune’ebé mak iha nomós bazeia ba nesesidade ne’ebé mak munisípiu iha, atu nune’e bele kobre ba fasilidade saúde ne’ebé mak iha Ermera.
Jornalista : Felicidade Ximenes
Editór : Cancio Ximenes
