DILI, 26 Maiu 2026 (TATOLI) — Asosiasaun Defisiénsia Timor-Leste (ADTL) fó sai katak to’o agora organizasaun ne’e fasilita ona Ema ho Defisiénsia (EhD) na’in-300 mak remata ona ensinu rekorrente ekivalente ho ensinu báziku klase 9, no preparadu ona atu hakat ba ensinu sekundáriu.
Diretór Ezekutivu ADTL, Cesário da Silva, hatete katak rezultadu ne’e realiza liuhusi kooperasaun entre ADTL no Ministériu Edukasaun, liuhusi Departamentu Ensinu Rekorrente, ne’ebé durante ne’e hala’o programa edukasaun iha ADTL nia fatin iha Mascarenhas, Dili.
“ADTL servisu hamutuk ho Ministériu Edukasaun liuhusi Departamentu Ensinu Rekorrente no loke mós eskola iha ADTL nia fatin. To’o agora ami prepara ona Ema ho Defisiénsia hamutuk 300 ne’ebé remata ona nível 5, ekivalente ho ensinu báziku klase 9, no sira prontu atu kontinua ba nível sekundáriu,” Cesário da Silva hateten ba jornalista TATOLI iha Dili.
Tuir nia, partisipante 300 ne’e mai husi organizasaun oioin ne’ebé servisu ho Ema ho Defisiénsia iha Timor-Leste, inklui Asosiasaun Halibur Defisiénsia Matan Timor-Leste (AHDMTL), ADTL, Klibur Defisiénsia Tilun, East Timor Blind Union, no mós membru komunidade defisiénsia seluk.
Cesário esplika katak graduadu balun remata ensinu rekorrente ho nível báziku kleur ona no iha vontade boot atu kontinua sira-nia estudu ba nível sekundáriu. Maibé durante ne’e seidauk iha estabelesimentu ofisiál ba ensinu rekorrente nível sekundáriu.
“Sira barak hakarak kontinua sira-nia estudu iha nível sekundáriu, maibé to’o agora governu liuhusi Ministériu Edukasaun seidauk implementa programa ensinu rekorrente ba nível ne’e,” nia dehan.
Maski nune’e, nia hatete katak iha fulan hirak liubá Konsellu Ministru aprova ona enkuadramentu legal ne’ebé aprezenta husi Ministériu Edukasaun kona-ba estabelesimentu ensinu rekorrente ba nível sekundáriu.
Ho aprovasaun legal ida-ne’e, ADTL espera katak programa ne’e bele implementa lalais, atu nune’e EhD 300 ne’ebé remata ona iha nível báziku bele kontinua sira-nia estudu.
“Bainhira ensinu rekorrente ba nível sekundáriu hahú ofisialmente, ADTL sei prepara no akompaña Ema ho Defisiénsia hotu-hotu ne’ebé remata ona atu kontinua sira-nia edukasaun,” nia dehan tan.
Ensinu rekorrente mak modalidade edukasaun ida ne’ebé dedika ba ema sira ne’ebé liu ona idade eskolar normal, la hetan oportunidade atu eskola iha tempu uluk, ka hakarak fila fali no kontinua sira-nia estudu.
Programa ne’e konsidera importante tebes atu garante inkluzaun edukativa no loke oportunidade ba Ema ho Defisiénsia sira iha Timor-Leste atu asesu ba edukasaun formal no dezenvolve sira-nia kapasidade.
Jornalista: Camilio de Sousa
Editór: Filomeno Martins
