Empata 0-0, AS Ponta Leste ho Nagardjo fahe pontu ba malu

DILI, 27 Maiu 2026 (TATOLI)—Ekipa AS Ponta Leste obrigadu tenke fahe de’it pontu ho nia adversáriu Nagardjo FC tanba empata 0-0, iha jogu kontinuasaun Liga Futeból Timor-Leste (LFTL) segubda divizaun, ne’ebé realiza kuarta kalan iha Estádiu Munisipál Dili.

Hanesan baibain iha kultura futeból, jogu la’o dirije husi árbitru fó orientasaun jogu hahú, bainhira jogu la’o ekipa rua liuhusi jogadór sira lansa kedan kontra no atake ba malu tuir tékniku no abilidade ne’ebé sira iha.

Ponta Leste utiliza roupa mean no Nagardjo utiliza mutin, armada rua ne’e lansa atake ne’ebé ho velosidade maka’as, maibé laiha ida mak forsa liu, sira iha forsa ne’ebé hanesan. Nune’e labele prodús golu ba malu.

Nagardjo halo jogu naruk ka pasa bola liuhusi aas, ou bola long, Ponta Leste halo jogu badak pasa bola liuhusi rai, maibé estratejia hirak ne’e hela de’it hanesan estratejia tanba labele rezulta nafatin golu.

Jogu entre ekipa rua dada malu to’o minutu primeira parte termina laiha golu, nune’e rezulradu hela ho 0-0.

Haka’at ba segunda parte, ekipa rua nafatin hatudu vontade jogu, ho presaun maka’as ba malu, maibé la bele halo golu ba malu.

Ponta Leste liuhusi jogadór avansadu lansa atake maka’as maibé atake hirak ne’e hela de’it ho naran, basa la sutu hotu ne’ebé Ponta Leste halo la kona iha alvu.

Nagardjo hatudu nia forsa maka’as, maibé forsa hirak ne’e sai hanesan tarjetu ida na Ponta Leste atu halo mate, ikus halo mate duni tanba sutu sira Nagardjo halo nunka kona iha alvu, sutu balu mós salva husi guarda rede Ponta Leste nian.

Nune’e to’o jogu termina laiha golu ruma akontese, ekipa rua iha hotu direitu atu rekolla pontu ida-ida iha jogu ne’e.

Jornalista : Hortêncio Sanchez

Editór         : Cancio Ximenes