BOBONARU, 27 Maiu 2026 (TATOLI) – Ministériu Juventude Desportu, Arte, no Kultura (MJDAK) hamutuk ho Autoridade Postu Administrativu Maliana, munisípiu Bobonaru, halo abertura ba atividade desportu komunitáriu ne’ebé envolve klubu futeból sanulu.
Atividade desportiva ne’e ho objetivu atu komemora Loron Restaurasaun Independénsia, 20 Maiu, ba da-24, hodi fó oportunidade ba joven sira hatudu sira-nia talentu iha área desportu.
Klube futeból ne’ebé sei anima komunidade Maliana durante semana rua mak Manu-Aman, Liurai Salvador, ETI, RBC Holsa, Hultopol, Laktil, FC Malibaka Yamato, Kristál, Ritabou no Malbek.
Koordenadór ba atividade, Elídio Florindo Tavares, hateten programa ida-ne’e importante atu kria pás no estabilidade iha komunidade, nomós kontribui ba dezenvolvimentu nasaun, liuliu iha postu administrativu Maliana.
Nia husu ba parte hotu atu kontribui no fó apoiu durante kompetisaun no labele hamosu dezentendimentu ne’ebé bele estraga ambiente dame.
Administradór Postu Administrativu Maliana, Augusto Caetano, iha nia intervensaun dehan maski atividade ne’e hala’o ho orsamentu ki’ik, maibé valór boot liu mak edukasaun no dezenvolvimentu abilidade ba joven sira.
“La’ós prémiu mak importante liu, maibé oinsá juventude bele aprende téknika, pasiénsia no sai jogadór di’ak”, nia realsa.
Nia mós husu ba foinsa’e sira atu husik hahalok ne’ebé la di’ak hanesan droga, alkohol no tabaku, no foku ba dezenvolvimentu an hodi bele sai joven ho talentu no profisionál iha futuru.
“Timor-Leste agora adere ona ba ASEAN no iha 2027 sei lidera konferénsia ASEAN. Tanba ne’e, juventude tenke prepara-an ho di’ak no hatudu talentu ho maneira profisionál”, Caetano akrexenta.
Iha fatin hanesan, Komandante Eskuadra PNTL Postu Administrativu Maliana, Inspetór Xefe Adérito de Jesus, husu ba ema hotu ne’ebé partisipa iha atividade referida atu hamutuk hodi kontribui ba susesu eventu ne’e.
Nia mós solisita ba árbitu sira atu lidera kompetisaun ho neutralidade hodi evita dezentendimentu entre ekipa sira. “Arbritrajen sira ne’ebé lidera jogu ne’e atu lidera ho neutralidade, labele halis ba parte ida hodi ita evita atu labele mosu dezentendimentu iha jogu. Alin-sira imi-nia idade sei ki’ik, tempu ba imi atu aproveita, hatudu imi talentu sira ne’ebé iha, liuliu tékniku individuál no grupu”, nia hato’o.
Atividade desportu komunitária ne’e espera bele sai meiu ida atu fó motivasaun ba joven sira hodi dezenvolve talentu individuál no grupu iha área futeból no modalidade seluk.
Abertura dahuluk ba desportu komunitáriu ne’e ho modalidade futeból juveníl no sei iha mós modalidade tolu seluk hanesan Hana-Kalik, Halai-Karon no Maratona ne’ebé sei realiza iha loron ida hamutuk ho finál jogu futeból.
Eventu ne’e organiza husi suku Holsa ho montante orsan hamutuk $3.500 ne’ebé hetan apoiu husi MJDAK.
Eventu futeból ne’e komisaun organizadora prepara prémiu ba primeiru lugar osan $300, segundu lugar $200 no terseiru lugar $150.
Jornalista: Sergio da Cruz
Editora: Maria Auxiliadora
