Kopa AFTL, Mushila domina Kuda Ulun ho golu 8-3
DILI, 27 Maiu 2026 (TATOLI)—Ekipa Mushila FC, iha kuarta kalan ne’e, domina jogu hodi susesu halakon nia adversáriu Kuda Ulun FC ho rezultadu 8-3 iha jogu kopa Asosiasaun Futsál Timor-Leste (AFTL) ne’ebé realiza iha kampu futsál FALINTIL-Forsa Defeza Timor-Leste (F-FDTL) Fatuhada.
Hanesan baibain jogu hahú ekipa rua lansa kedan kontra no atake ba malu tuir orientasaun árbitru ninian, jogadór klube rua lansa atake maka’as ba malu hodi buka se loos atu hatama uluk golu.
Mushila halo atake ne’ebé maka’as, iha minutu tolu (3), jogadór Joel Fernandes marka ona golu hodi loke Mushila nia golu dahuluk, la kle’ur de’it jogadór Evinho Guterres lansa tan golu ida iha minutu haat (4) hodi lori Mushila lidera 2-0. La’ós ne’e de’it Natalisio Santos mós prodús tan golu iha minutu lima (5) hodi aumenta Mushila nia golu ba 3-0.
Jogu la’o manas liutan basa kontra atake sai alvu ba ekipa rua, Kuda Ulun la nonook hodi responde ho presaun, ikus iha minutu 14 jogadór José Rodrigues responde ona golu ida hodi muda rezultadu ba 1-3.
Mushila la nonook halo atake maka’as ba Kuda Ulun, nune’e iha minutu 23 ne’e jogadór João Paulo halo jogu ne’ebé furak hodi aumenta tan golu ida ba Mushila muda rezultadu ba 4-1.
Jogu ne’e animadu tebes, adeptu sira mós la nonook hamriik iha tribun fó apoiu ne’ebé maka’as ba sira-nia ekipa favorotu ida-idak. Jogu minutu dahuluk termina, Mushila provizóriu lidera jogu ho eskoru 4-1.
Tama ba segunda parte, ekipa rua nafatin halo presaun ba malu, jogu la’o to’o minutu 29 ne’e jogadór Angelo Fernandes husi Mushila lees tan golu ida hodi aunenta Mushila nia golu no golu ne’e halo Kuda Ulun sente la seguru maibé kontinuavreziste basa rezultadu semo ona ba 5-1. Iha minutu 31, Joel Fernandes lansa tan golu ida muda liután Mushila nia golu ba 6-1.
Kuda ulun kontinua joga ho kalma maske rezultadu semo dook ona, ho jogu ne’ebé di’ak iha minitu 34 jogadór Petrus Nahak lansa golu hodi aumenta Kuda Ulun nia golu rezultadu muda ba 2-6.
Mushila la nonook hosi kontinua halo presaun no pasa bola husu ain ba ain, nune’e to’o iha minutu 35, jogadór Evinho Guterres hatama tan golu ida muda rezultadu ba 7-2. Kuda Ulun responde atake sira mabé susar atu domina Mushila nia jogu.
Biar nune’e, iha minutu 38 jogadór Nelio Cardoso la nonook esforsu hodi prodús tan golu muda nia ekipa Kuda Ulun nia golu ba tolu hodi hatur rezultadu 3-7.
Maske minutu besik termina ona, Mushila halo jogu ho kakutak matenek, jogadór Rivaldo Faria tenke prodús tan golu ikus iha minutu 39, nune’e taka jogu ne’e ho rezultadu 8-3.
Jornalista : Hortêncio Sanchez
Editór : Cancio Ximenes
