Lica-Lica FC kontra Hibers Dili FC empata 2-2
DILI, 27 Maiu 2026 (TATOLI)—Ekipa husi Munisípiu Vikeke ho naran istimadu Lica-Lica Lemorai FC, kuarta kalan ne’e, tenke fahe pontu ho nia adversáriu Hibers Dili FC basa empata 2-2.
Jogu ba ekipa rua (2) realiza iha Estádiu Munisipál Dili, kuarta kalan iha jogu kontinuasaun Liga Futeból Timor-Leste (LFTL) segunda divizaun époka 2026.
Hanesan baibain, jogu hahú ekipa rua lansa kedan kontra no atake ba malu tuir tékniku no abilidade ekipa ida-idak nian oinsá atu buka golu.
Jogu la’o iha ámbitu emosionál tanba ekipa rua ho intensidade jogu ne’ebé as no euforia husi adeptus sira la para halo Estádiu Dili atu nakfera.
Armada Lica-Lica halo kontra atake ne’ebé adekuadu, maibé Hibers tenta hamate jogu ne’ebé Lica-Lica halo, ikus Hibers susesu duni iha nia jornada liuhusu jogadór Alfert Tefa iha minutu sia (9) lansa ona golu dahuluk hodi hatuur skore ba 1-0.
Husi golu ne’e halo jogu sai manas liután, armada Lica-Lica la nonok, jogadór sira halo presaun maka’as hasoru Hibers, ikus presaun hirak ne’e la hela de’it hanesan presaun tanba jogadór Ivo Pinto loke ona Lica-Lica nia golu iha minutu 19 lori skore muda ba 1-1.
Jogu sai empata, Hibers tenke servisu maka’as oinsá manán jogu ne’e, maibé Lica-Lica la fó fatin, halo atake ne’ebé maka’as ho tékniku ne’ebé utiliza liu bola rai, pasa husi ain ba ain, ikus iha minutu 23 jogadór Nelcio Fernandes loke tan Lica-Lica nia golu hodi muda rezultadu ba 2-1.
Husi golu ne’e halo Hibers sente la seguru, maibé nafatin joga ho kalma, la ansi halo golu bainhira seidauk kona iha alvu, minutu kontinua la’o ba oin, Lica-Lica tenta atu aumenta golu maibé defeza Hibers la fó fatin, ikus to minutu primeira parte termina rezultadu provijoriu hela ho 2-1.
Dolar ba segunda parte, ekipa rua lansa tan kontra no atake ba malu, maibé Lica-Lica nafatin mantein nia ritmu jogu, Hibers susar atu kombate nune’e susar atu prodús golu.
Lica-Lica loko-an joga ho kalma hodi hein minutu termina sira bele manán jogu ne’e, maibé sira la sente katak Hibers halo presaun maka’as ho objetivu ense golu.
Esforsu Hibers nian la hela de’it ho esforsu, ikus iha minutu 73 jogadór Lica-Lica halo erru hasoru avansadu Hibers iha kedan lina oin, árbitru foti desizaun fó penalidade.
Ho oportunidade ne’e, Hibers konsidera hanesan momntu osan mean, basa golu ne’e atu salva sira husi derrota, penalidade ne’e ezekuta husi jogadór Denilson Soares.
Ezekusaun ne’e kona duni iha alvu, bola tama liu rede laran muda duni rezultadu ba 2-2, husi golu ne’e salva ona Hibers husi derrota nakfilak ba empata hofi fahe pontu ba malu.
Golu ne’e hanesan golu últimu ba ekipa rua tanba to’o jogu termina laiha tan ekipa ida prodús golu, rezultadu hela ho empata 2-2.
Jornalista : Hortêncio Sanchez
Editór : Cancio Ximenes
