DILI, 27 Maiu 2026 (TATOLI)—Ekipa jigante Ramelau FC fahe de’it pontu ba malu ho nia adversáriu Saralima FC ho rezulatdu empata 2-2, iha jogu kontinuasaun Kopa Asosiasaun Futsál Timor-Leste époka 2026 ne’ebé realiza iha kampu futsál FALINTIL-Forsa Defeza Timor-Leste (F-FDTL) Fatuhada.
Jogu ba ekipa rua ho intensidade ne’ebé aas, sira la hatudu pontu fraku ba malu, sira hamriik firme hodi defende sira-nia ekipa ho solidu.
Bainhira jogu la’o iha primeira parte, ekipa rua lansa kedan kontra no ateke ba malu tuir tékniku no abilidade ekipa ida-idak nian, objetivu dahuluk mak hatama golu no manán.
Ramelau hanesan ekipa jigante, nunka hatudu nia pontu fraku, maibé Saralima hatudu jogu ne’ebé brilante iha minutu haat (4) de’it, jogadór Francisco dos Reis fura ona golu dahuluk hodi muda rezultadu ba 0-1.
Ramelau la nonook responde ho velosidade ne’ebé maka’as, nune’e iha minutu hitu (7) jogadór Duarte da Costa responde ona golu dahuluk hodi halo empata jogu ne’e. Ramelau nafatin joga ho intensidade aas, Saralima mós hatan ho atake ne’ebé la’ós fraku liu maibé natoon.
Ramelau sai forsa liután tanba jogadór sira kombina malu ho di’ak, nune’e iha minutu 13 jogadór Francisco dos Reis responde tan golu ida hodi muda rezultadu ba 2-1. Husi golu ne’e hanesan golu ikus iha minutu primeira parte.
Hakat ba segunda parte ekipa rua kontinua lansa atake ba malu, Ramelau halo jogu hodi aumenta golu, maibé labele tanba Saralima halo defensivu maka’as.
Saralima halo jogu ne’ebé adekuadu, rapidu no fintas bola ba mai halo Ramelau susar atu kombate, nune’e iha minutu 33 jogadór Bendito Ramos marka tan golu ikus hodi impede Ramelau nia vitória. Husi ne’e Ramelau ho Saralima tenke fahe de’it pontu ba malu tanba empata 2-2.
Jornalista : Hortêncio Sanchez
Editór : Cancio Ximenes
