Ramos-Horta hato’o votu kmanek Eid al-Adha ba Musulmanu iha TL no mundu
DILI, 27 Maiu 2026 (TATOLI)—Prezidente Repúblika, José Ramos-Horta, hato’o votu kmanek AI-Adha ba komunidade Musulmanu hotu iha Timor-Leste no mundu.
“Maluk Komunidade Musulmanu Timor-Leste, hodi povu Timor-Leste nia naran, ha’u hato’o ha’u-nia votu kmanek ba imi hotu iha okaziaun ksolok Eid al-Adha 2026,” Prezidente Ramos-Horta hateten iha nia karta ofisiál ne’ebé Agência TATOLI asesu, ohin.
Horta dehan, Eid al-Adha fó hanoin mai ita kona-ba istória profunda husi Profeta Ibrahim nia fiar ne’ebé metin no vontade atu sakrifika saida mak folin liu ba nia iha devosaun ba Maromak.
“Iha Timor-Leste, ita mós hatene kbiit perdaun nian no beleza husi harii nasaun ida iha-ne’ebé fiar hotu bele reza ho livre. Ita simu prinsípiu fraternidade umana hanesan trasa iha Dokumentu kona-ba Fraternidade Umana ba Pás Mundiál no Moris Hamutuk. Dokumentu ida-ne’e bolu ita atu rekoñese katak ita hotu nu’udar membru husi família umana ida de’it, kria ho direitu no dignidade ne’ebé hanesan,” nia tdehan.
Nia hatutan, Timor-Leste nu’udar testemuña ba posibilidade atu moris hamutuk, etnia hotu, fiar hotu, Katóliku, Musulmanu, Protestante, no fiar-na’in tradisionál sira moris hanesan maun-alin.
“Ba ita-nia maun-alin komunidade musulmanu Timor-Leste nian: imi mak parte integrante no selebra iha família diversfikada nasaun nian. Imi-nia kompromisu ba pás, imi-nia nia servisu maka’as hodi harii ita-nia demokrasia joven, no imi-nia espíritu jenerosidade durante époka santa ida-ne’e hametin espíritu kle’an husi ita-nia nasaun,” nia afirma.
Ba komunidade musulmanu iha mundu tomak: Timor-Leste hamriik hamutuk ho imi. Iha mundu ida-ne’ebé dala barak nakfera tanba konflitu no dezentendimentu, Eid ida-ne’e sai hanesan inkarnasaun moris ida husi fraternidade umana.
“Mai ita hanoin katak laiha ema ida mak superiór liu fali ema seluk; só sira ne’ebé serbí umanidade ho kompaixaun mak verdadeiramente boot. Bainhira imi halibur hamutuk ho imi-nia família, hasa’e imi-nia orasaun, no fahe imi-nia hahan sira ho sira-ne’ebé iha susar, hatene katak imi la mesak. Imi-nia ksolok mak ami-nia ksolok; imi-nia pás mak mundu nia esperansa,” nia hateten.
Hein katak Eid al-Adha ida-ne’e lori ksolok, pás no prosperidade ba imi-nia família no komunidade. Hein katak ida-ne’e bele hametin liután ligasaun sira-ne’ebé halibur ema hotu nu’udar povu ida de’it, no bele inspira ema hotu atu kontinua serbisu hamutuk ba Timor-Leste ida-ne’ebé justu, kompaixaun no prósperu liu.
“Eid Mubarak ba ita-nia komunidade Musulmanu tomak! Ho solidariedade no amizade,” Ramos-Horta dehan.
Jornalista : Hortêncio Sanchez
Editór : Cancio Ximenes
