LIKISA 24 Maiu 2025 (TATOLI)–Prezidente Repúblika, José Ramos-Horta, husu ba komunidade sira iha suku Leorema, postu adminsitrativu Bazartete munisípiu Likisa atu proteje animál fuik hanesan laku no meda ne’ebé iha valór ekómiku tanba prodúz kafé laku-teen.
Xefe Estadu hato’o pedidu ne’e bainhira partisipa serimónia abertura feira kafé LEOBALI foinlalais ne’e, iha suku Leorema.
“Iha Hong Kong no Japaun, kafé laku teen ne’e folin-boot tebes, killo ida bele hetan to’o dólar amerikanu atus lima ($500). Ha’u husu ba populasaun, labele oho animál sira-ne’e, ita tenke sai ezemplu ba protesaun animál no protesaun ba floresta,”tenik Horta.
Tuir nia animal fuik hirak ne’e sei mohu bainhira komunidade sira la fó protesaun ba ambiente, Floresta no bee matan sira tanba ne’e save ba moris di’ak maka tenke proteje.
Iha fatin hanesan Xefe Suku Leorema, Damião Manuel Gonzalves, hateten katak sira prontu kolabora atu fó protesaun ba animál fuik hanesan laku no meda iha sira-ninia suku iha futuru.
“Ami prontu koopera, ami komprende katak balada sira-ne’e iha diretu atu moris no fó benefísiu ekonómiku ba ita tanba kafé laku teen ne’e reseita ne’ebé di’ak tebes ba komunidade,” dehan Damiao.
Ministru Agrikultura, Floresta, Peskas no Pekuária (MAFPP), Marcoz da Cruz fó hanoin ba komunidade katak floresta ne’ebé loos mak segredu ba biodiversidade tanba ne’e komunidade sira atu labele tesi ai arbiru no kasa animál fuik.
“Turista sira mai la’ós de’it atu haree paisajén, maibé sira mai atu haree mós ita-nia biodiversidade. Se ita kuidadu animál sira hanesan ular, lekirauk, meda, no seluktan, ne’e sei sai atensaun boot ba turizmu,” tenik Ministru Marcoz
Jornalista ːFrancisco da Costa Sony
Editór ː Florencio Miranda Ximenes
