Tinan 23 ezisténsia, KomJer Afonso husu UPM kontinua serví ho lealdade no profisionalizmu
DILI, 27 Maiu 2026 (TATOLI)—Komandante Jerál (KomJer) Polísia Nasionál Timor-Leste (PNTL), Komisáriu Asistente Polísia Afonso dos Santos, bainhira partisipa iha sebrasaun tinan 23 ezisténsia Unidade Polísia Marrítima (UPM), husu atu membru sira atu serví ho lealdade no profisionalizmu.
“Hafoun imi-nia kompromisu hodi kontinua serví ho lealdade, profisionalizmu no esprítu patríotiku, garante soberania no integridade ita-nia fronteira marrítima, katak Unidade Polísia Marrítima kontinua sai hanesan símbolu ba disiplina,” KomJer Afonso dos Santos hateten iha Kuartel UPM, Seonál, Kuarta ne’e.
Nia deskreve, UPM nia profisionalizmu, disiplina no dedikasaun merese hetan rekoñesimentu husi instituisaun no povu timoroan tanba serbisu iha tasi ezije korrajen, espíritu misaun no sentidu boot ba responsabilidade.
“Ha’u hakarak espresa ha’u-nia gratidaun ba membru hotu ne’ebé kontribui ona ba unidade ida-ne’e,” nia akresenta.
Notísia relevante : Operasaun UPM iha tasi Timor kaptura tripulante 32 ho ikan tonelada sia
Nia mós agradese ba Governu nia apoiu ba investimentu no reforsu kapasidade operasionál UPM nomós ba parseiru internasionál no instituisaun kooperasaun ne’ebé fó apoiu iha formasaun, kapasitasaun téknika, fornesimentu ekipamentu no fortalese kooperasaun marrítima.
KomJer dehan, tempu ne’ebé naruk tinan 23 nia laran, UPM dezempeña ona papél importante ba defeza soberania nasionál hodi halo protesaun no seguransa ba parte marrítima.
“UPM hanesan unidade espesializada ida husi PNTL ne’ebé responsável ba vijilánsia, patrullamentu, intersesaun no fizkalizasaun iha kosteira no domíniu marrítima, kontribui ba prevensaun no kombate kriminalidade no ilísitu sira seluk,” nia tenik.
Timor-Leste hanesan illa ne’ebé reprezenta rikeza fundamentál ida ba Timor Leste, tamba ne’e, KomJer konsidera garante seguransa marrítima hanesan misaun ida ba interrese nasionál.
“UPM kontinua kombate peska ilegál sira, kontrabandu, imigrasaun ilegál no ameasa transnasionál sira seluk,” nia reforsa.
KomJer rekoñese, rezultadu sira ne’ebé alkansa ona iha tinan 2025 tanba UPM nia rezultadu serbisu, hanesan realiza ona patrulla dala-244 ba marrítima no patrulla terrestre 2.499 hodi rejista detensaun hamutuk 30 relasiona ho krime kontrabandu, halo apreensaun ba produtu ilísitu oioin, espesialmente tabaku no bebida.
“UPM mós halo salvamentu ba ema na’in-11 iha tasi. Ida-ne’e hatudu nia prontidaun operasionál iha asaun buska no salvamentu, asisténsia ba komunidade iha kosteira no fó apoiu umanitáriu iha situasaun emerjénsia, ida-ne’e hatudu sira-nia kompromisu hodi kontribui diretamente ba protesaun vida umana iha tasi,” KomJer hato’o.
Jornalista : Natalino Costa
Editora : Julia Chatarina
