IGEADE.I.P sei normaliza ponte silek ne’ebé maka ameasadu kotu
KOVALIMA, 28 Maiu 2026 (TATOLI)-Prezidente Autoridade Munisípiu Kovalima, Miguel Armada Cardoso, hateten ekipa Institutu Jestaun Ekipamentu no Apoiu Dezenvolvimentu Infraestrutura, Insitutu Públiku (IGEADE.I.P),sei normaliza ponte silek ne’ebé lokaliza iha aldeia Aidantuik, suku Beco, postu administraiva Suai, Kovalima iha tempu badak.
Tuir nia udan boot ne’ebé maka akontese foin lalais rejulta ponte ne’e ameasadu atu kotu no mós komunidade ninia uma hamutuk 21.
“Ita informa ona situsaun ne’e ba IGE ne’ebé iha Suai Loro no Suku Laktos postu administrativu Fohorem hodi halo normalizasaun hafoin finaliza sira sei halo normalizasaun iha Bolu,ʺnia hateten ba jornalista sira iha Kovalima, ohin.
Autoridade munisipál ne’e husu ba sidadaun hotu-hotu atu labele tesi-ai no sunu rai arbiru, halo toos besik mota ninin hodi evita hamosu dezastre naturál iha tuturu.
Iha parte seluk, viítima inundasaun, Alberto de Jesus reforsa udan boot ne’ebé akontese foin lalalis konsege estraga ponte kiik no auto-estrada.
“Ha’u-nia uma afetadu ba inundasaun relasiona konstruaun ponte kiik no bee labele halai ba tasi nune’e ba fali bairru laran entaun fó impaktu ba ami hodi hamosu inundasaun ba ami,”nia esplika.
Komunidade ne’ebé hela iha suku Beco husi aldeia haat mak afetadu ba inundasaun hamutuk uma-kain 21 balun hetan ona apoiu emerjénsia no balun seidauk tanba sei kontinua rekolla dadus husi suku sira seluk inklui estraga toos aktare 5-resin.
Jornalista: Celestina Teles
Editor: Florencio Miranda Ximenes
