Kopa AFTL: Mauputar FC vs AD B.A.S empata 3-3
DILI, 28 Maiu 2026 (TATOLI)—Ekipa Mauputar FC iha jogu kontinuasaun kopa Asosiasaun Futsál Timor-Leste (AFTL) tenke fahe pontu ho nia adversariu AD B.A.S tanba rezultadu jogu empata 3-3.
Jogu ba ekipa rua ne’ebé realiza iha kampu futsál Falintil-Forsa Defeza Timor-Leste (F-FDTL) Fatuhada, iha kinta kalan ne’e, jogadór husi ekipa rua hatudu kedan sira-nia forsa ba malu tuir tékniku no abilidade ne’ebé kesi metin ona iha mundu futeból.
Ho kontra ateke ne’ebé iha, Mauputar domina liu bola, nune’e iha minutu rua (2) jogadór Juan Alexa lansa ona golu dahuluk hodi muda rezultadu ba 1-0. Maske sofre ona golu ida maibé la sai difikuldade ba AD B.A.S atu kontinua esforsu hodi kombate no dezmantela husi liña ba liña.
Husi esforsu hirak ne’e, AD B.A.S nia jogadór Fernando Ximenes konsege responde duni golu iha minutu 11, hodi muda rezultadu ba empata 1-1. Husi golu ne’e halo ekipa rua hala’o jogu ne’ebé ho rtítmu bonitu, maibé to’o jogu primeira parte termina laiha tan golu ruma akontese.
Hakat ba segunda parte, ekipa rua kontinua halo presaun ba malu, maibé AD B.A.S hatudu nia forsa ne’ebé maka’as liuhusi jogadór Jho Viegas konsege fura rede Mauputar nian iha minutu 21 hodi muda rezultadu ba 1-2. Husi golu ne’e, AD B.A.S hanoin bele lidera ona jogu, maibé Mauputar sa’e ho forsa naton halo kombate jogu.
Nune’e, monu iha minutu 35, jogadór Mauputar Juice Liunokas lees kedan guarda rede hodi rezulta golu ida muda ba empata 2-2. Jogu ne’e sai rame liutan, AD B.A.S hadau bola ho lais, nune’e iha minutu hanesan 35 jogadór Celcio Soares responde kedan golu ida hodi muda rezultadu ba 2-3 iha atake malu ne’ebé ho intensisade aas.
Maibé Mauputar la nonook, sira esforsu maka’as nafatin, nune’e monu iha minutu 36 sira konsege responde duni golu ida liuhusi jogadór Juice Liunokas hodi muda rezultadu ba empata 3-3.
Husi golu Mauputar nian ne’e mak hanesan golu ikus hodi taka jogu referidu, no ekipa rua tenke hakotu jogu ho rezultadu empata.
Jornalista : Hortêncio Sanchez
Editór : Cancio Ximenes
