DILI, 28 Maiu 2026 (TATOLI)—Ekipa Maudoko FC susesu iha nia jornada hafoin liki nia adversáriu AS Jerman ho rezultadu 5-0, iha jogu kontinusaun Kopa Asosiasaun Futsál Timor-Leste, ne’ebé realiza iha kampu futsál FALINTIL-Forsa Defeza Timor-Leste (F-FDTL) Fatuhada, kinta kalan.
Ho tékniku no abilidade ne’ebé kada jogadór iha, ekipa Maudoko hahú nia jogu ho ritmu ne’ebé aas, basá jogadór sira fintas bola ba-mai, lansa xutu ne’ebé maka’as maibé Jerman tenta hamate bola.
Jogu la’o manas liután, bainhira jogadór Maudoko, Verito Fragoso, iha minutu haat (4), lansa ona golu dahuluk hodi lori rezultadu ba 1-0.
Jogu manas liután, ekipa Jerman ladun kontrola bola ho di’ak, nune’e jogu foun nani ba minutu neen (6), jogadór Maudoko domina liutan bola no Dewa Henuk marka tan golu daruak hodi muda Maudoko rezultadu 2-0.
Jogadór Jerman tenta atu kombate, maibê Maudoko loko-an hodi hatudu jogu ne’ebé bonitu iha adeptu atus ba atus nia oin, euforia husi adeptu sira maka’as iha minutu ba minutu, jogadór Jerman nia mentalidade hahú monu no Maudoko hetok semo iha anon leten.
Ho nune’e, iha minutu 11, jogadór Maudoko Ivanildo Rangel marka tan golu ida muda rezultadu ba 3-0, Ho golu ne’e, halo Jerman susar liutan atu kombate, xutu barak mós Jerman halo maibé sempre salva husu guarda rede Maudoko no xutu balun la kona iha alvu.
Ho Golu Ivanildo nian ne’e mak taka jogu minutu primeira parte no Maudoko lidera rezulatdu provizóriu iha jogu primeira parte ne’e ho rezulatdu 3-0.
Dolar ba segunda parte, ekipa rua kontinua lansa atake ba malu, Jerman buka meiu hotu atu hatama golu, maibé armada Maudoko la fó fatin, Maudoko nia defeza metin no jogadór sira kombina malu di’ak liutan la fó oportunidade na Jerman atu prodús golu.
Jogu la’o manas no jogadór Jerman ladun kontrola ho di’ak fó tan oportunidade ba Maudoko liuhusi jogadór Dewa Henuk lees tan rede Jerman dala ida dudu rezultadu ba 4-0.
Golu ne’e lori Maudoko nia rezultadu nahe-an dook tebes no tebes duni husi Jerman, jogadór sira esforsu maka’as maibé esforsu sira hotu hela de’it hanesan esforsu basa la prodús golu.
Maudoko nia jogadór sira hametin sira-nia espíritu jogu, hametin sira-nia unidade iha minutu 24 Gilson Correia ramata tan golu ida hodi hametin Maudoko nia golu ba lima (5) no Jerman kontinua hela ho zero.
Ekipa Jerman esforsu atu marka netik golu, maibé Maudoko la fó fatin, ikus jogu ne’e termina laiha tan golu ruma husi ekipa rua no jogu termina ho rezultadu 5-0, vitória prega metin ba Maudoko no Jerman hela ho derota.
Jornalista: Hortêncio Sanchez
Editór : Cancio Ximenes
