DÍLI, 28 Maiu 2026 (TATOLI) – Funsionáriu na’in-17 husi Sekretaria Estadu Kooperativa (SEKoop) hetan formasaun kona-ba “Service Excellence”, ne’ebé fasilita husi organizasaun Next Era Synergy husi Indonézia, ho objetivu atu hasa’e kualidade atendimentu públiku iha instituisaun ne’e.
Formasaun ne’e realiza durante loron lima, hahu husi 25 to’o 29 Maiu 2026, iha Hotel Novo Turismo, Lecidere, Díli.
Objetivu prinsipál hosi formasaun ne’e mak atu hasa’e sira-nia koñesimentu, abilidade no kapasidade profissionál hodi responde ho di’ak ba nesesidade atendimentu públiku no membru kooperativa sira.
“Formasaun ida-ne’e foka liu ba oinsá hasa’e abilidade no kapasidade funsionáriu sira iha atendimentu públiku, atu bele fó servisu ho di’ak, efisiente no efikás ba komunidade no mós ba instituisaun Estadu nian,” dehan Diretora Nasionál Administrasaun no Finansas SEKoop, Margaretha Viegas Mali.
Nia esplika tan katak partisipante sira hamutuk na’in-17 ne’e mai husi Departamentu Nasionál Administrasaun no Finansas SEKoop.
Iha fatin hanesan, formadór Next Era Synergy, Ivan Gideon, hateten katak nia iha esperansa boot katak formasaun “Service Excellence” ne’e bele fó benefísiu ba funsionáriu SEKoop sira, liuliu iha oinsá fó atendimentu ho lalais, profissional no ho kualidade aas.
“Hau espera katak depoisde tuir formasaun ida-ne’e, funsionáriu SEKoop sira bele iha tan koñesimentu no abilidade foun, inklui iha área dijitalizasaun, atu hasa’e atendimentu públiku ne’ebé efisiente no efikáz iha Timor-Leste,” dehan Ivan Gideon.
SEKoop konsidera formasaun ne’e importante atu reforsa kapasidade rekursu umanu iha instituisaun, atu nune’e bele melhora servisu ba membru kooperativa sira no públiku iha jerál.
Jornalista: Camilio de Sousa
Editór: Filomeno Martins
