DILI, 29 Maiu 2026 (TATOLI)—Governu liuhusi Ministériu Saúde sei servisu hamutuk Organizasaun Saúde Mudiál iha Timor-Leste kria komisaun ida hodi prepara ba Timor-Leste sei sai uma-na’in ba reuniaun Komité Rejionál Organizasaun Mundiál Saúde ba Rejiaun Sudeste Aziátiku (OMS-SEARO) ba da-79 iha tinan 2026.
“Ministériu Saúde mós prepara enkontru importante ida ba rejiaun, ne’ebé envolve nasaun sanulu inklui Timor-Leste. Ministériu sei aprezsenta planu atividade kada fulan to’o Setembru no kria ekipa servisu hamutuk ho Organizasaun Mundiál Saúde nomós ministériu relevante sira atu prepara simu konvidadu sira no diskute nesesidade saúde iha rejiaun Sudeste Aziátiku,” Ministra Saúde, Élia dos Reis Amaral, hateten ba Jornalista sira iha PN, ohin.
Nia relata, Governu sei planeia atu konvida mós Diretór Rejionál Sudeste Aziátiku iha ASEAN atu mai partisipa iha atividade ida-ne’e.
Ministériu mós planeia konvida diretór rejionál OMS atu partisipa iha diskusaun refere, atu garante koordinasaun ne’ebé efetivu, Governu sei harii komisaun integradu ida ho liña Ministeriál no komisaun relevante sira seluk.
Ministra Saúde, Elia A. A. dos Reis Amaral, kuarta ne’e, iha reuniaun Konsellu Ministru, aprezenta preparasaun ba reuniaun Komité Rejionál Organizasaun Mundiál Saúde ba Rejiaun Sudeste Aziátiku (OMS-SEARO) ba da-79 ne’ebé Timor-Leste sei sai uma-na’in iha tinan 2026.
Timor-Leste nu’udar Estadu-Membru husi Organizasaun Mundiál Saúde dezde tinan 2002 no integra iha OMS-SEARO dezde tinan 2003, sai ona uma-na’in ba reuniaun Komité Rejionál ba da-69 iha tinan 2015.
Ministra Saúde, Elia Amaral, hateten ohin sira aprezenta proposta balun ba Primeiru-Ministru, atu haree ba preparasaun Timkr-Leste ne’ebé sei sai uma-na’in ba enkontru nivel altu setór saúde nian hanesan rejionál komité ba da-79.
Reuniaun ne’e sei partisipa husi Estadu membru sira hanesan Ministru saúde sira husi Índia, Nepal, Bangladesh, Maldivas, Srilanka, Tailándia, Mianmar, Korea no mós Timor-Leste rasik.
Enkontru ida-ne’e, nia hatutan, sei realiza durante loron rua ne’ebé sei hahú husi loron 07 to’o 09 fulan-Setembru 2026, tanba ne’e informasaun sei atualiza iha tempu tuir mai.
Enkuantu tuir perkursu ida-ne’e, Timor-Leste sei asume fila-fali papél nu’udar uma-na’in ba sorumutu nivel altu ida-ne’e, ne’ebé sei hala’o iha Dili.
Sorumutu ne’e, hetan partisipasaun husi Ministru Saúde no responsável importante sira husi Estadu-Membru rejiaun ne’e nian, nu’udar espasu importante ida ba diálogu no koordenasaun kona-ba prioridade no polítika iha setór saúde, hodi kontribui ba reforsu kooperasaun rejionál no mós hadi’a sistema saúde no resposta ba dezafiu komún sira.
Jornalista : Felicidade Ximenes
Editór : Cancio Ximenes
