BAUKAU, 29 Maiu 2026 (TATOLI)—Asidente tráfegu rezulta karreta ambulánsia hetan estragu iha Suku Seisál, Postu administrativu Baukau Vila.
Sasin la’en pasiente, Jelito Monteneiro, haktuir karreta ambulánsia ho xapa matríkula 04-578 tula pasiente husi Munisípiu Lautein hetan asidente kauza husi karau korta iha área Kampung Baru, Suku Seisál.
Ambulánsia referida tula pasiente ho kondisaun isin gravida akompaña husi oan na’in ida no parteira ida hamutuk ho motorista diresaun husi Suku Rasa, Postu Administrativu Lospalos, purvolta tuku 00:00 Otl kalan mezmu tuir dalan situasaun di’ak maibé to’o iha área purvolta tuku 03:00 madrugada mosu asidente tanba karau korta.
“Ami halai neineik karau ne’e korta, ida mak karreta sama, tolu baku aan ba karreta rezulta vidru iha oin nakfera no janela motorista nia sorin rahun,” Jelito Monteneiro hateten iha Ospitál Rejionál Eduardo Ximenes (HoREX-sigla portugeza), Sesta ne’e.
Jelito relata, hafoin hetan asidente, hetan kedas apoia hodi dezloka vítima sira bá HoREX enkuantu karreta refere para mantein iha lokál asidente.
Iha fatin ketak, sasin Maria Julieta Correia, hateten asidente referidu akontese bainhira komunidade dukur maibé derepente rona tarutu nune’e halai sai hodi haree iha-ne’ebé rezulta karau ida mate fatin no karreta referida hetan estragu maka’as iha parte oin.
“Polísia sira mai sukat ona karau mate ne’e na’in laiha entaun polísia sira dudu tiha karreta ne’e no tula karau mate lori tiha ona ba,” Julieta hateten.
Entretantu, asidente tráfegu referidu rezulta vítima sira halo tratamentu iha HoREX Baukau, enkuantu karreta ambulánsia evakua ona bá Dili.
Jornalista: Natalino Belo
Editór: Xisto Freitas da Piedade
