BAUKAU, 29 Maiu 2026 (TATOLI)—Autoridade suku husu Governu liuhusi Ministériu Agrikultura, Pekuária, Peska no Floresta (MAPPF) atu apoia ai-moruk pestisida no pesoál estensionista hodi garante produsaun hare iha époka tinan-ne’e.
Xefi Suku Buruma, Postu Baukau Vila, Libório dos Santos Freitas, esplika kondisaun klima tinan-ne’e afeta ba kolleta tanba udan ho intensivu aas fó impaktu ba prosesu produsaun liuliu komunidade ne’ebé kuda iha faze dahuluk fulan-Marsu no Abríl.
“Ita husu ministériu apoia ai-moruk ba kombate pestisida no pesoál estensionista tanba maioria agrikultór utiliza sistema tradisionál,” Xefe Suku Buruma informa ba TATOLI liuhosi telefónema, Sesta ne’e.
Libório relata klima tinan-ne’e liuliu fulan-Maiu udan ho intensivu aas lori impaktu ba hare faze dahuluk tanba hein kolleta, enkuantu faze daruak foin faze kuda nune’e sei fó impaktu pozitivu ba prosesu produsaun.
Aleinde ne’e, fatór fini hare tipu nakroma ho kilógrama 300 ne’ebé antes ne’e distribui ba komunidade la tuir kondisaun rai iha Suku Buruma ne’ebé lori impaktu mós ba produsaun époka tinan-ne’e.
“Iha poténsia tinan-ne’e menus produsaun,” Libório Freitas akresenta.
Entretantu, Suku Buruma poténsia ba setór agrikultura liuliu hare ho ektare 661 lokaliza iha Aldeia Ono-Sere no Suli-Ua.
Suku Buruma hamutuk aldeia haat kompostu husi Aldeia Tasi, Suli-Ua, Kasamutu no Ono-Sere ho tótal populasaun hamutuk 3.245.
Jornalista: Natalino Belo
Editór: Xisto Freitas da Piedade
