DILI, 29 Maiu 2026 (TATOLI)—Governu liuhusi Sekretáriu Estadu Ensinu Sekundáriu Jerál no Tékniku Vokasionál (ESTV), Sesta ne’e, halo lansamentu Programa Nasionál Ekivalénsia ba joven ka adultu sira iha eskola Ensinu Sekundáriu Tékniku Vokasionál Ekonomia no Komérsiu Bekora, Dili.
Sekretáriu Estadu Ensinu Sekundáriu Tékniku Vokasionál, hateten ohin lansa ona programa ne’e, oportundiade ba estudante sira aprende ho di’ak.
“Ha’u-nia mensajen ba joven sira, liuliu sira-ne’ebé mak seidauk ramata sira-nia ensinu sekundáriu, ne’e oportunidade di’ak ida ba ita-boot sira, ba joven sira, nune’e bele mós mai partisipa iha programa ida-ne’e,” Domingos Lemos Lopes dehan ba jornalista sira.
Governante ne’e tenik objetivu prinsipál husi programa ekivalénsia ida-ne’e mak atu fó oportunidade daruak ba joven no adultu sira ne’ebé uluk lakon oportunidade atu konklui sira-nia estudu ka abandona eskola tanba sirkunstánsia moris no kompleksidade oioin.
Nia hateten, programa ne’e nakloke ba sidadaun hotu nune’e bele alkansa sira-nia objetivu no muda koñesimentu, liuliu iha área siénsia nian.
Iha fatin hanesan, Diretór Jerál ESTV, Deolindo Da Cruz, subliña katak investimentu iha ensinu rekorrente ne’e hanesan mós investimentu direta iha kapitál umanu no dezenvolvimentu ekonómiku Timor-Leste nian.
“Edukasaun nafatin nakloke ba joven no adultu sira no laiha limitasaun ne’ebé hetan ekivalénsia ida-ne’e, sira sei sai fali forsa servisu ne’ebé kualifikadu, kriativu, inovativu, no prontu atu kontribui fali ba progresu no dezenvolvimentu ita-nia rai laran,” Diretór Jerál Deolindo dehan.
Lansamentu projetu pilotu ne’e konsege la’o ho susesu tanba hetan apoiu no laran-luak husi Diresaun Eskola ESTV Ekonomia no Komérsiu Bekora ne’ebé fasilita sala rua, no mós kolaborasaun husi estrutura tomak, kuadru ministériu, parseiru dezenvolvimentu, konsultór nasionál no internasionál sira.
Eduardo Tilman, nu’udár estudante ba programa ekivalénsia ensinu sekundáriu ne’e sente orgullu loos tanba Governu bele lansa ona programa ida-ne’e kona-ba edukasaun ekivalénsia hodi fó biban ba joven sira hodi kontinua sira-nia estudu.
”Ami la kontinua iha bareira balun hanesan ita-nia ema boot sira mensiona katak ekonomia no ba buat sira seluk. Maibé, husi parte ha’u-nia impedementu mak asesibilidade entaun ha’u la konsege atu ultrapasa no ha’u la konsege hetan diploma ohin Governu halo lansamentu ba programa ida-ne’e, ha’u sente kontente tebes tanba ha’u bele hetan fali ha’u-nia diploma,” nia tenik.
Jornalista: Osória Marques
Editór: Xisto Freitas da Piedade
