VIKEKE, 29 Maiu 2026 (TATOLI)—Koordenadór Bee Timor Leste, Empreza Públika (BTL, E.P.) Munisípiu Vikeke, Marito da Costa, relata, melloramentu sistema bee-moos iha Postu Administrativu Ossú empreza responsavel konklui ona servisu, rezulta komunidade hamutuk 413 daudaun ne’e asesu ona bee-moos.
“Obra melloramentu sistema bee-moos husi BTL, E.P. ne’ebé implementa iha Postu Administrativu Ossú ita-nia empreza implementadór finaliza ona. Nune’e, agora daudaun ne’e ita komesa fornese bee-moos ba komunidade iha Postu Ossú Vila,” Marito da Costa hateten ba TATOLI iha Postu Vikeke Vila, Sesta ne’e.
Nia dehan instalasaun kontadór iha Postu Ossú hamutuk 413 ne’e instala ona no komunidade komesa selu ona.
“Daudaun ne’e ita-nia komunidade ne’ebé hela iha Ossú Vila mak asesu, maibé tun ba Borala no Rai-Mean seidauk asesu tanba ita-nia bee nia débitu ki’ik. Tan ne’e mak ita labele fornese ba komunidade sira seluk,” nia esklarese.
Kona-ba fornesimentu bee-moos ne’e maihusi rekursu bee-matan rua mak hanesan bee-matan antiga Uaibua nian ho débitu litru tolu pur-segundu no bee-matan Uaikirona litru rua pur-segundu.
Tuir dadus, iha Postu Ossú uma-ka’in hamutuk 665 daudaun ne’e seidauk asesu bee-moos tanba débitu bee nian ki’ik no atuál asesu bee-moos hamutuk uma-kain 413 ne’ebé instala ona metru kontadór.
Entretantu, obra melloramentu bee-moos iha Postu Ossú implementa iha tinan 2025, responsabiliza husi empreza CDFG Unipessoal, Lda, iha-ne’ebé harii tanke foun tolu, reabilita tanke tolu no dada kanu hosi bee-matan Mundu Perdidu bá Ossu Vila, ho totál kustu $421.903,57.
Jornalista: Vitorino Lopes da Costa
Editór: Xisto Freitas da Piedade
