VIKEKE, 29 Maiu 2026 (TATOLI)—Pontu Vogál Raes Hadomi Timor Oan (RHTO) Munisípiu Vikeke, Natalino Pinto, informa RTHO kontinua hakbiit ema ho defisiénsia sira liuhusi formasaun ba setór agrikultura sira.
“Ami kontinua fó apoia sira hanesan formasaun agrikultura no artezenatu sira ba ita-nia ema ho defisiénsia sira hodi kria rasik sira-nia servisu. Ami la obriga sira maibé depende filafali sira idaidak mak deside an hakarak halo atividade sira. Nune’e, ita iha grupu hamutuk haat ona, iha-ne’ebé tolu halo atividade ortikultura, grupu ida implementa idropónia kuda modo iha paralon laran, halo atividade artezenatu ho nuu nia kulit sai fali kopu ka sikra sira hodi fa’an filafali,” Natalino Pinto ba TATOLI iha Postu Vikeke Vila, Sesta ne’e.
Nia esplika materiál no fini sira-ne’e parte RTHO mak fó apoia ba ema ho difisiénte sira hodi implementa sira-nia atividade ortikultura no artezenatu.
Natalino informa atividade agrikultura ne’e RTHO servisu hamutuk ho parseiru sira husi Ministériu Agrikultura, Peska, Pekuária no Floresta (MAPPF) no Organizasaun TOMAK hodi oferese formasaun agríkola ba ema ho defisiénsia sira.
“Husi atividade sira-ne’e ita-nia ema ho defisiénsia sira mak kria grupu ne’ebé kada grupu ne’e envolve ema na’in-lima, balun neen no balun na’in-sia. Nune’e, daudaun ne’e ami observa ita-nia maluk defisiénsia sira-nia atividade ortikultura no artezenatu la’o hela,” nia subliña.
Nia afirma, liuhusi atividade sira-ne’e bele ajuda ema ho defisiénsia no bá-oin RHTO sei kontinua akompaña no tau-matan ba ema ho defisiénsia.
Tuir dadus, ema ho defisiénsia rejistadu iha Munisípiu Vikeke ho totál 4.016 kompostu husi tipu EhD ba matan, tilun, fíziku no mentál.
Jornalista: Vitorino Lopes da Costa
Editór: Xisto Freitas da Piedade
