DILI, 31 Maiu 2026 (TATOLI)—Jogadór avansadu Romário Florindo sai eroi tanba salva nia ekipa Weasel FC husi vitória ne’ebé adversáriu AC Mamura foti iha minutu 30.
Flori nia eroi hatuur loloos iha Estádiu Munisipál Dili bainhira jogu besik termina ona iha minutu 58. Estádiu Munisipál Dili hakmatek, ema hotu foku ba jogu ekipa rua nian, ema hotu hanoin Mamura lidera ona jogu no nia mak sai na’in ba vitória, maibé realidade mosu oin seluk, basá Weasel sei hahoris nia jogadór di’ak ida-ne’ebé sai eroi loloos ba jogu entre ekipa rua ne’e.
Jogu ba ekipa rua ne’e hala’o iha Estádiu Munisipál Dili, Domongu loraik ne’e. Jogu ne’e hanesan jogu kontinuasaun segunda divizaun Liga Futeból Timor-Leste (LFTL) époka 2026.
Hanesan baibain, jogu hahú árbitru hú ona árbitu hatudu katak jogu la’o ona. Bainhira jogu la’o ekipa rua lansa kedan kontra no atake ba malu tuir tékniku no abilidade ekipa rua nian.
Jogu ne’e la’o, Weasel domina liu bola halo jogu moris iha liña ba liña. Mamura la nonook. Nia (Mamura) koko responde ho atake, maibé atake hirak ne’e balun kona iha alvu no balun la kona iha alvu.
Jogu ne’e asiste husi adeptu atus ba atus. Ekipa rua hatudu vontade manán husi minutu dahuluk, maibé defeza metin ho guarda-rede nia prestasaun di’ak halo golu susar tama.
Jogu primeira parte ne’e manas. AC Mamura agresivu daudaun. Nune’e, iha minutu 30, avansadu Mamura Wolter Kalau hetan oportunidade liuhusi xutu husi li’ur área penalidade, bola tama liu rede laran hodi muda rezultadu ba 1-0.
Husi golu ne’e, Weasel hatán kedas ho kontra-atake lalais iha minutu 35 ba leten maibé guarda-rede Mamura halo defeza furak hodi salva ekipa. Primeira parte taka ho 1-0.
Tama bá segunda parte, treinadór ekipa Weasel halo mudansa tátika. Mudansa ida-ne’e fó kedas efeitu. Avansadu Weasel Romário Florindo simu bola kle’an husi klaran, nia hakat liu defeza ida no xutu kruzada ba riin naruk, iha-ne’ebé bola lolo liubá rede halo guarda-rede Mamura la konsege salva. Bola golu. Rezultadu nakfilak ba 1-1.
Hafoin golu impata, jogu nakloke liután. Ekipa rua buka golu vitória to’o minutu ikus. Iha minutu 88, Mamura besik atu marka tan liuhusi bola livre besik área grandeia adversária, maibé bola kona riin. La konsege golu. Tempu mós termina daudaun. Árbitu huu apitu ikus ho rezultadu 1-1.
Husi rezultadu ne’e, ekipa rua tenke fahe de’it pontu ba malu, nune’e Mamura rekolla ona pontu hamutuk haat (4) husi jogu dala rua, enkuantu Weasel rekolla pontu ida (1) husi jogu dala ida (1).
Jornalista: Hortêncio Sanchez
Editór: Xisto Freitas da Piedade
