DÍLI, 01 Juñu 2026 (TATOLI) – Prezidente Asosiasaun Movimentu Kablaki Timor-Leste (AMKTL), Vicente Sarmento, hateten desde 2022 to’o agora, AMKTL hamutuk ho Sekretaria Estadu Floresta (SEF) kuda ona ai-mahoni oan hamutuk 3.333 iha komunidade nia to’os iha munisípiu tolu: Dili, Manatuto, no Aileu.
Vicente esplika katak programa ne’e la’o ho objetivu atu promove reflorestasaun no protege rai husi erozau, liuliu iha área komunidade sira nian.
“Observasaun hatudu katak ai-oan hirak ne’e iha kresimentu di’ak,” Vicente Sarmento dehan ba jornalista TATOLI iha Kai-Koli, Dili, ohin.
Tuir nia, iha Munisípiu Dili kuda ona ai-mahoni oan 200 resin área Dare. Iha Manatuto, kuda ona ai-mahoni oan 500 no iha Aileu mos kuda ona ai-oan 500.
Nia hateten katak kuda ai mahoni sira ne’e iha objetivu prinsipal atu proteze erozau rai no mos atu fó valor ekonomia adisionál ba komunidade sira iha futuru.
“Objetivu husi ai mahoni ne’e mak atu prevene erozau rai komunidade nian, no bainhira ai-oan booy ona bele mós sai fonte rendimentu ba familia sira,” nia dehan.
Vicente Sarmento mós akresenta katak tuir planu, iha tinan 2027 AMKTL sei kuda tan ai-mahoni hamutuk 10.000 iha munisípiu seluk hanesan Ermera, Ainaro, Covalima (Suai), no Liquiçá.
Ai mahoni nu’udar ai-hun boot ida ne’ebé iha valór ekonómiku aas. Iha Timor-Leste, ai ne’e uza barak ba konstrusaun, mobiliáriu, no atividade reflorestasaun.
Tanba nia valór ekonomia no ambientál, Ministériu Agrikultura hamutuk ho parseria internasionál sira hanesan União Europeia no organizasaun naun-governamentál sira kontinua fahe ai mahoni oan ba komunidade sira atu kuda iha to’os no área protejida.
Jornalista: Camilio de Sousa
Editór: Filomeno Martins
