DILI, 01 Juñu 2026 (TATOLI)-Bankada FRETILIN husu ba Governu atu mellora implementasaun Programa Merenda Eskolár iha munisípiu Baukau, Manatutu no Lautein.
Deputadu FRETILIN, Antoninho Bianco, hato’o kestaun ne’e iha ámbitu debate proposta Orsamentu Retifikafivu iha Parlamentu Nasionál, ohin.
Nia haktuir katak bainhira halo kontaktu eleitorál iha baze, liuliu iha Laklubar-Manatutu, simu preokupasaun kona-ba Programa Merenda Eeskolár ne’ebé paradu dezde fulan-Janeiru 2026.
Iha sorin seluk, deputada FRETILIN, Ana Bela Sávio, mós relata katak sira simu keixa barak husi estudante no inan-aman sira, iha Eskola Bázika Kuluhun-Lautein no Eskola Bázika Sentrál (EBC) Lautein, EBC Sentru Lospalos, katak estudante sira konsome hahán la to’o tuir presu ne’ebé define ona. Tanba ne’e, husu autoridade munisípiu atu kontrola.
Deputada Marquita Soares mós levanta preokupasaun hanesan katak Eskola Primária Kaisidu, Baukau, nia fornesimentu produtu ba estudante sira la tuir mós presu no menú ne’ebé iha.
Responde ba ida-ne’e, Prezidente Autoridade Manatutu, Luís Fernandes, admite katak implementasaun merenda eskolár la’o tarde, tanba submisaun relatóriu sira tarde. Nia esplika katak problema ne’e la’ós akontese iha eskola bázika sentrál sira ho númeru alunu ne’ebé boot, maibé akontese iha eskola filial sira ne’ebé iha númeru estudante 50 to’o 60, tanba problema ho relatóriu.
“Ita buka implementadór de’it mós susar, satán husu sira atu halo relatóriu [no] asina kontratu. Ita halo sumáriu ho de’it alunu 80 multiplika ba sentavu 0,40 sentavu pur volta $32. Iha fatin sira ne’ebé izoladu tebes no susar buka hahán sira”, katak.
Tanba ne’e, munisípiu iha ekipa avaliadora hodi halo akompañamentu no daudaun propoin ona atu halo treinamentu ba ekipa implementadora sira.
Prezidente Autoridade Munisípiu Lautein, Mélio de Jesus, klarifika preokupasaun ne’ebé levanta husi deputadu katak ida-ne’e loos no autoridade forma ona ekipa investigasaun ba kestaun ne’e.
Iha sorin seluk, Prezidente Autoridade Munisípiu Baukau, Veneranda Lemos, agradese ba observasaun husi deputadu sira no nia dehan implementasaun merenda eskolár iha Baukau hahú ona ho produtu lokál no diminui ona foos importadu.
Jornalista: Nelson de Sousa
Editora: Maria Auxiliadora
