VIKEKE, 02 Juñu 2026 (TATOLI)—Ekipa husi Ministériu Administrasaun Estatál (MAE), Tersa ne’e, fó asisténsia téknika kona-ba implementasaun programa Planu Integradu Dezenvolvimentu Munisipál (PIDM) ba kargu Servisu Munisipál Vikeke sira hodi hasa’e koñesimentu.
Diretór Jerál Dezenvolvimentu Lokál MAE, Virgílio da Costa, haktuir formasaun ba kargu xefia sira iha Munisípiu Vikeke atu fó asisténsia téknika nian para oinsá eleva koñesimentu ba autoridade sira hodi hatene implementasaun programa PIDM iha Munisípiu Vikeke nune’e bele atinje alvu prinsipál sira-ne’ebé garante ba bem-estar nian.
“PIDM ne’e sai instrumentu jestaun ida-ne’ebé fó ba ita atu kada diresaun sira bele apár ho PDIM nian prosesu sira hahú husi programa, sub-programa, define planu prioridade sira kada anuál to’o tinan lima. Tan ne’e, ita presiza define planu prioridade sira PDIM la’os buat foun,” Virgílio da Costa, hateten iha abertura formasaun asisténsia téknika iha salaun Munisípiu Vikeke, Tersa ne’e.
Virgílio hatutan, liuhusi asisténsia téknika ne’e, bá-oin bele implementa ho di’ak no difine programa prioridade sira bazeia ba nesesidade no poténsia ba rai Munisípiu Vikeke nian.
Nia esplika formasaun asisténsia téknika foku ba planu eleborasaun sira-nian hodi hasa’e koñesimentu servisu diresaun sira iha Munisípiu Vikeke.
Iha fatin hanesan, Reprezentante Prezidente Autoridade Munisípiu Vikeke, Estevão de Carvalho, husu diretór no xefe departamentu sira atu foku ba formasaun sira-ne’e hodi hasa’e koñesimentu para dezenvolve Munisípiu Vikeke.
“Oportunidade sira-ne’e ita tenke aproveita ho di’ak atu ita iha vizaun ida-ne’ebé di’ak ba planu dezenvolvimentu iha ita-nia munisípiu. Ohin loron ita esforsu hakarak tama ba desentralizasaun no podér lokál, nune’e liuhusi asisténsia téknika sira-ne’e para ita prepara di’ak liután,” nia hato’o.
Rekorda fali katak tinan 2026 PIDM Munisípiu Vikeke implementa obra hamutuk 14 ho totál orsamentu hamutuk rihun $3, ne’ebé foka ba setór agrikultura, edukasaun, saúde no turizmu.
Entretantu, partisipa iha formasaun asisténsia téknika ne’e kompostu husi diretór munisipál, administradór Postu Vikeke Vila, xefe departamentu no funsionáriu sira.
Jornalista: Vitorino Lopes da Costa
Editór: Xisto Freitas da Piedade
