DILI, 03 Juñu 2026 (TATOLI)—Governu liuhusi reuniaun Konsellu Ministru, kuarta ne’e, deside fó podér tomak ba Embaixadora Timor-Leste ba Komunidade Austrália, Inês Maria de Almeida, hodi asina deklarasaun intensaun ba Estabelesimentu Relasaun Diplomátika entre Governu Repúblika Demokrátika Timor-Leste no Governu Estadu Federadu Mikronézia nian.
Inisiativa ida-ne’e, objetivu atu formaliza estabelesimentu relasaun diplomátika entre nasaun rua ne’e, tuir prinsípiu sira husi Karta Nasaun Unida no Konvensaun Viena nian kona-ba Relasaun Diplomátika, loron 18 Abríl 1961.
Ministru Negósiu Estranjeiru no Kooperasaun, Bendito dos Sanros Freitas, hateten ohin sira deside fó poder ida ba embaixadora Timor-Leste ba Austrália atu hamutuk ho Embaixadora Estadu Federadu Mikronézia nian atu asina akordu ba ita-nia kooperasaun bilaterál.
“Entaun kooperasaun bilaterál ne’e sira sei ko’alia kona-ba asuntu oioin iha servisu bilaterál nian entaun buat foun mak ita sei servisu hamutuk,” Ministru Bendito informa ba jornalista sira iha Palásiu Governu.
Desizaun ne’e reflete interese mútuo Timor-Leste no Estadu Federadu Mikronézia nian atu hametin lasu amizade no kooperasaun bilaterál, hodi kontribui ba hametin dame no seguransa internasionál, bazeia ba prinsípiu igualdade entre Estadu, soberania nasionál, independénsia, integridade territoriál no laiha interferensia ba asuntu internu.
Akordu sira-ne’e ho objetivu atu hametin kooperasaun bilaterál liuhusi promove parseria entre instituisaun ensinu no peskiza, interkámbiu estudantes, dosente no espesialista, fahe prátika no esperiénsia edukativa sira-ne’ebé di’ak, dezenvolvimentu programa formasaun no peskiza nian, no mós promosaun oportunidade ba bolsa estudu, depende ba disponibilidade rekursus husi parte rua.
Iha asina memorandu entendimentu iha área edukasaun sei asina hosi Ministra Edukasaun, Dulce de Jesus Soares, no Ministra Edukasaun no Formasaun Profisionál Vietname nian.
Aleinde memorandu entendimentu iha área ensinu superiór, siénsia, no kultura sei asina husi Vise Primeiru-Ministru no Ministru Ensinu Superiór, Siénsia no Kultura ein-ezersísiu, Mariano Assanami Sabino. Akordu rua ne’e sei asina hosi Ministru Edukasaun no Formasaun Vietname nian.
Jornalista : Alexandra da Costa
Editór : Cancio Ximenes
