DILI, 03 Juñu 2026 (TATOLI)—Kandidatu 118 pasa ona iha prosesu verifikasaun ba rekoñesimentu nu’udár Kombatente Libertasaun Nasionál, maibé lista ne’ebé seidauk sai definitivu, sei hein aprovasaun finál husi autoridade kompetente antes publika ba públiku.
Ministru Asuntu Kombatente Libertasaun Nasionál, Gil da Costa Monteiro hateten, kandidatu sira-ne’ebé pasa ona verifikasaun mai husi eskalaun oioin, inklui eskalaun ida, rua no tolu.
Nia esplika, prosesu identifikasaun no verifikasaun ne’e hala’o husi ekipa téknika ne’ebé responsavel ba levantamentu no análize dadus partisipasaun iha luta libertasaun, la’ós diretamente husi ministru.
Tuir nia, lista ne’ebé prepara ona sei sai editál provisóriu antes hetan aprovasaun finál husi Prezidente no Sekretáriu Estadu relevante. Depoiz aprovadu, lista ne’e sei publika ba públiku, inklui timoroan sira ne’ebé hela iha rai-li’ur hanesan Austrália no Portugál.
Ministru Oan-Soru dehan tuir Estatutu Kombatente Libertasaun Nasionál, ema ida atu hetan rekoñesimentu tenke prova partisipasaun mínima tinan tolu iha luta libertasaun. Kandidatu sira ne’ebé la to’o kritériu referidu automatikamente labele simu rekoñesimentu nu’udár kombatente.
“Identifikasaun ne’e la’ós ministru mak halo, maibé ekipa verifikadór sira-ne’ebé hala’o identifikasaun no verifikasaun tuir dadus no prova ne’ebé disponivel,” nia dehan ba jornalista iha nia knaar fatin, Komoro, Kuarta ne’e.
Nia akresenta katak depoiz editál provisóriu sai, públiku sei iha oportunidade atu hato’o reklamasaun ka kontestasaun tuir lei.
“Kuandu iha informasaun ka prova foun, ema bele halo reklamasasaun ka kontestasaun tuir mekanizmu legál ne’ebé vigór. Bainhira prosesu ne’e remata no la iha tan protestu mak lista definitivu sei sai,” nia hateten.
Ministru reafirma katak instituisaun sei kontinua tuir prosedimentu legál hotu atu asegura transparénsia no justisa ba prosesu rekoñesimentu Kombatente Libertasaun Nasionál.
Hosi totál sira na’in-118 ne’e, iha na’in-14 mak ho tipu pensaun 20 á 24, na’in-11 ho tipu pensaun 15 á 19, kombatente na’in-15 konsideradu hanesan pensaun 8 á 14, kombatente na’in-31 konsideradu hanesan Prestasaun Pekuniária Únika, 4 á 7, ho menus tinan-tolu iha dedikasaun eskluziva no la konsideradu hanesan kombatente.
Ekipa sira-ne’ebé halo validasaun ba dadus Frente-Esterna nian inklui Dr. Hermenegildo Agio Pereira (Atuál Ministru Prezidénsia no Konsellu Ministrus iha IX Governu Konstitusionál), Dr. Roque Rodriguês, Dr. Marí Alkatiri, Inês de Almeida (Terseira Vise Prezidente CCLN no atuál Embaixadóra TL bá Australia), Estanislau Aleixo da Silva, ho Antigu Diploma sira seluk tan.
Jornalista: Osória Marques
Editór: Xisto Freitas da Piedade
