KOVALIMA, 05 Juñu 2026 (TATOLI)- Prezidente Autoridade Munisípiu Kovalima, Miguel Armada Cardoso, sesta-ne’e hamutuk ho funsionáriu hala’o limpeza iha tasi Suai-Loro hodi selebra loron nasionál Tasi.
“ Ita orienta funsionáriu sira mai hamutuk iha ne’e hodi halo limpeza hodi selebra loron mundiál oseana, ita halo limpeza iha tasi tanba beleza tasi Timor furak tebes, nune’e ita halo limpeza oinsá atu kuida tasi se ita rasik la kuida no la halo limpeza tasi sei nakonu ho lixu”, Autoridade Kovalima Miguel Armada Cardoso, hato’o deklarasaun ne’e iha tasi-ibun Suai-Loro.
Autoridade Kovalima mós dehan,Atu beleza tasi sai furak presiza hamoos lixu sira nakonu iha tasi ibun no labele so’e lixu arbiru iha tasi hodi estraga ambiente tasi.
Autoridade mós hasai ona despaixu ba Administradór postu Administrativu sira no ba autoridade komunitária katak kada sesta feira presiza halo limpeza jerál, nune’e ida-idak bele kuida sira-nia ambiente moos, atu halo limpeza iha fatin públiku sira hanesan tasi Suai-Loro,Autoestrada ne’e responsabliza husi autoridade nian.
“Selebra loron nasionál no mundiál oseana ho atividade limpeza hanesan ezemplu ba komunidade sira nune’e atu garante beleza tasi moos no furak hodi atrai vizitante sira.Loron Mundiál Oseana Ekonomia Azul garante no promove rikusoin ba jerasaun. Hau nia Tasi Ha’u nia Timor”.
Jornalista:Celestina Teles
Editór: Florencio Miranda Ximenes
